「你問我愛你有多深，愛你有幾分？」臨近中秋，聽住鄧麗君嘅《月亮代表我的心》，令人倍增思念情懷。曾被稱為靡靡之音，當然係眾多高清碟嘅收錄對象，但目前發燒CD制式種類，實在多得令人眼花撩亂，在港製Blu-rayAudio面世前，已有七大熱門高清規格，在你花大錢講究前後級功率、喇叭輸出之前，不若聽聽高清協會主席AlanLee介紹，先學吓點揀高清CD。
記者：陳國輝
攝影：陳陶鈞
Model：Fiona@Zmodel
百幾蚊到萬幾蚊
剛入門，膽粗粗買部5位數字嘅高級CDPlayer，就以為懂得細聽品味，大錯特錯！其實，每隻CD背後，製作技術不盡相同，例如有突破24bit母帶處理技術嘅XRCD24，又有透光率奇高，售價高達萬幾銀嘅玻璃CD，以上東東，你知幾多？今次搵咗亞洲高清協會主席AlanLee，詳談市面上最流行嘅七大高規格CD，真正識聽歌嘅人，可能係由揀碟開始。
1.藍光技術製CD
Blu-SpecCD
藍光（Blu-ray）就聽得多，但講到Blu-Spec似乎唔係人人認識。呢種CD製作技術由SONY提倡開發，雖然佢只係一隻普通CD，只需要一部極平凡嘅CDPlayer就可以播放，但整個製作過程上，卻採用藍光碟方式去做。例如底部利用藍光碟嘅材質，以及藍光刻錄技術，令密度比一般CD為高，細緻度更精密，高強度抗刮花，音色還原度更強，可達到降低噪音嘅效果。
2.逐隻燒錄神枱級數
LPCD45
跟一般以母帶作模具，然後壓製成CD的技術完全唔同，LPCD45採用一對一直刻印製嘅方式生產，簡單啲講，即係直接燒錄咁解；好處除咗保證到每張CD以及母帶有相同嘅音色效果，唔會出現失真情況之外，再加埋佢限量生產，可防止翻版；但話分兩頭，事關逐隻燒錄須要花費好多時間，與壓製嘅速度相比，效率肯定較低。
3.24bit靚聲還原
XRCD24
今時今日最流行，兼且有啲歷史嘅肯定係XRCD。由XRCD進化到XRCD20，直至2003年，日本JVC再利用全新技術，製作出XRCD24；最大特色，佢突破性以24Bit嘅的母帶技術來處理，再單簡講，CD只能夠以16bit播放，但XRCD24可讓任何CD機發揮出24bit的動態效果，即係話音色嘅還原度更厲害，甚至有人宣稱佢比LP更靚聲。
4.特別塗層耐光耐熱
AQCD
只要將碟背反出來，你會發現到雷射物料嘅顏色，跟以往見到嘅銀色好唔同！其實AQCD採用紫銀合金技術嚟研發，碟底並非傳統嘅鋁質反射塗層，而係紫色基片，照射燈光時分別就更明顯！AQCD好處係耐熱、耐光，比一般CD較為襟玩，但弱點係佢採用母片壓製而成，而且一印隨時過萬張，變相質素就無乜保證喇。
5.萬多元價比水晶
玻璃CD
乜玻璃都可以製作CD咩？絕無欺騙成份，喺CD市場上一直好少人提及，更無辦法成為主流，原因係售價實在太貴！好似呢隻郭雅志嘅《江河水》，售價就接近萬二蚊，而最入門嘅亦起碼五至六千先有交易；玻璃CD特點係質感似水晶，表面光滑，而且透光率高；重量則比傳統CD重兩倍多，長時間讀碟可能對播放器造成較大損耗。
6.㗎仔落手操刀
HQCD
最靚係由日本壓製，以及經當地音樂師做Mastering工序嘅HQCD，程序極之嚴格！碟嘅表面使用聚碳酸酯塑膠（PolycarbonatePlastic），佢係一種用製作LCD液晶屏幕嘅材料，好處係能夠大幅度提升音色品質和更精確地讀取數據。另外，HQCD仲採用特殊合金反射膜，折射率比普通CD為高，可以播出近乎原音嘅高品質音色。
7.提高取樣頻率
HDCD
情況有啲似XRCD24，HDCD同樣由24bit以及88.2kHz嘅高精度製作，當你用CDPlayer播放嗰陣，呢批數碼訊號將會變番成CD嘅16bit格式；好處係由於訊號轉換時，取樣頻率提高咗，所以音色精度會更加準確；此外，也令傳統CD格式中可能遺漏嘅數據分離出嚟，簡單啲講就即係一種壓縮技術。
專家教揀碟：成敗在於錄製質素
睇完7種CD製作技術，真係頭都痕！如果你剛中毒，但未算深，購買邊類CD最啱入門初哥？根據AlanLee講，其實咁多種CD制式並無統一準則，即係話，唔會因為XRCD24比較流行，所以音色就講究一啲；佢話，大部份所謂唔同嘅CD製作技術，其實只產生同一結果：精細啲、準確啲。要是想選購一隻「靚」CD，最終都係睇番隻Master質素係點，仲有當然係錄音師嘅功夫喇！
