放假行街街，唔覺意買咗件曼城，一着返工，蘋果波神話我點解咁似拿斯尼，戰鬥員A話我做咩咁反骨，財經同事問我係咪要印拿斯尼，其實冇嘅，件衫係上季月下貨，兩嚿半唔使就有交易，仲要靚仔過今季嗰件多多聲，心諗去DoublePark買件T都唔得啦，本來想拎去印巴洛迪利，夠囂！不過計下條數，唔抵，當T粗着先抵！
粉藍色睇落順眼，曼城開季戰績都順眼，佢哋作客係屎，不過佢哋叠水，所以咁叠馬，啲銀紙夠掟死狗，吹咩！幾咁霸道！迪斯高夠fit，大衛施華同阿古路兩條矮仔又鬼死咁夾，對熱刺往績係差，不過今時唔同往日囉，嘿嘿，曼城3連勝，咁我「開倉版」都3連勝咯。
守丹
星期日20
熱刺vs曼城
心水：曼城（上）
心得：曼城人強馬壯