魔盜王、積克船長、又或「唔唱K」鍾意到叫錯名嘅Johnny「Deep」,好多人已經將以上名字畫上等號。JohnnyDepp鬼馬演出,加上緊張刺激場面,令加勒比海盜長做長有!系列到第四集《加勒比海盜:魔盜狂潮》,雖然驚喜不大,雞肋味濃,但玩3D再加送激凸美人魚,呢勻真係尊尼「Depp」魚喇!
記者:韓繼聰
攝影:楊錦文
Model:ManisChiu
必睇美人魚大戰
新一集加勒比海盜無咗靚仔OrlandoBloom,女Fans可能會失望,但加番個彭妮露古絲同一班Sexy美人魚,男Fans應該會笑晒!故事基本上同前三集無乜關係,當獨立外傳睇完全冇問題。Blu-ray畫質唔錯,但3D效果同電影一樣認真麻麻,唔少場景只係將背景加少少3D效果,令人物同背景分開前後兩層,意義不大。不過又唔好失望住,爛船都有三斤釘,美人魚激凸出場,大戰一幕又係激戰連場,3D效果亦夠勁,大班美人魚直頭想游出畫面咁!另外片頭嘅追逐位,同片尾嘅決戰位同樣精采,特別係臨尾黑鬍子船長被水捲到變骨一幕,隻白骨爪真係伸到去眼前一樣!配合DTS-HDMA7.1環迴聲效,現場感十足,唔錯!
Bonus:Lego版夠過癮
睇完3D版,千祈唔好漏咗隻2D版,因為絕對有驚喜!2D版收錄咗幾段特別Bonus,其中Lego版魔盜王一定要睇!經典電影劇情,包括美人魚大戰一幕,用Lego動畫加可愛爛Gag重新演繹,睇完一定會心微笑!相比起四集都差不多嘅公式化場面,絕對新鮮過癮!可惜嘅係片段比較短,有多幾段睇就真係VeryGood喇!再加埋例牌嘅幕後花絮,睇到JohnnyDepp戲裏戲外一樣鬼馬,根本就係做返自己,仲有一眾演員鏡頭背後蝦碌實況,Fans一定鍾意!