模組合Donut嘅四位成員Rainbow、Alina、Vilian同埋ArYu噚日下晝喺旺角行人專用區為亞視嘅全新單身男女速配節目《撻著》造勢宣傳，佢哋向街上嘅市民派宣傳單張同埋表格，邀請市民參加節目，雖然Donut背心短褲打扮青春，Alina更加低胸上陣，不過唔知係市民怕醜定Donut吸引力麻麻，佢哋派到身水身汗都只係成功說服到兩男兩女合共四個市民即場填表格參加，當中包括一位中年男人。
強調唔查男友手機
Rainbow接受訪問時就話自己都係單身，對於呢個速配節目自己都想參加埋一份，佢話：「做嘢時候識嘅人都已經局限晒，所以都想參加呢個節目識返個好男人，係咪好有錢都唔緊要，最緊要係錫我。」
Rainbow又話唔怕喺節目會識到啲背景不明嘅男人，如果會郁手郁腳打佢呢？Rainbow就笑言最好唔好，而自己亦都唔會去check男友部手機，有乜事都寧願扮唔知算喎！