熱火前鋒「大帝」勒邦占士早前完成咗訪華之旅，之不過佢嚟到神州大地，竟然唔搵番個神醫幫吓自己。講緊嘅係勒邦占士嘅禿髮問題，佢日前就喺twitter留言話發夢都想頭髮快啲生番出嚟，唉！如果求吓就得償心願，我求大俠早就中咗幾百萬次六合彩頭獎啦！
網民惡搞頭帶戴落頸
年僅27歲嘅勒邦占士，佢嘅脫髮問題查實已經困擾咗佢好耐，但自從喺07年總決賽輸咗畀馬刺，之後每年為騎士衝鋒陷陣，贏咗兩屆常規賽MVP，但喺季後賽都係輸波收場，搞到佢舊年夏天由克利夫蘭加盟熱火，做咗犯眾憎嘅球員；剛完結嘅球季，雖然拍住獲迪同保殊，但係都要喺總決賽輸畀小馬。可能因為越輸越頭痕，脫髮情況越嚟越嚴重，每季戴頭帶嘅位置就逐年上升，呢次佢自己喺twitter求神拜佛希望生髮，憎恨佢嘅球迷就即刻惡搞一餐，用電腦合成咗一幅佢前額全禿、頭帶戴到落頸嘅相，真係搞笑！
湖人後衞拜恩都已經33歲，雖則依然係一剔嘅當紅巨星，之不過品牌嘅未來始終都係維繫於勒邦占士身上，呢位「大帝」一日贏唔到總冠軍，地位就依然唔可以動搖到拜恩，家佢仲有禿髮嘅問題，想場內場外取代已奪5屆總冠軍嘅拜恩，榮登真正「一剔1哥」，真係唔容易。
學朗尼植髮有得諗
其實有救星可以幫到占士，呢位仁兄就係足球界嘅紅人、同係一剔人嘅曼聯嘅前鋒朗尼，周薪超過20萬鎊嘅佢，同占士一樣都面對禿髮問題；但佢喺今夏用咗30幾萬搵咗專人幫佢植髮，似乎解決咗呢個危機，同老婆高蓮出海嘆世界盡情玩樂！我求大俠覺得占士今次嘅禿髮危機，可以令到佢同朗尼嘅友誼加深，之但係占士身份比較尷尬，皆因佢同時貴為英超利物浦嘅班主，話晒紅魔同紅軍係世仇，唔知朗尼最終肯唔肯幫占士呢？