新一季港甲下個禮拜六就正式開「咧」，揭幕戰作客鬥「港版巴塞」傑志嘅晨曦，噚日就喺會長周文亮（大B哥）帶領下全軍去到沙田車公廟拜神祈福，祈求車公保佑新球季場場勝利。大前日先抵港加盟嘅澳洲小國腳米奴維洛域都入鄉隨俗，除低副太陽眼鏡先上香，仲好有信心咁話希望可以協助球隊爭奪聯賽錦標同亞協盃參賽資格；至於同樣係新加盟嘅「師兄」卓卓就更加虔誠，添香油、轉風車再敲埋鼓，勢領球隊打響頭炮！
呢支去季「4哥」今季大換血，除咗羅致咗鄭少偉、梁子駿等一班華將外，外援都有成籮，大B哥話唔介意外借球員予其他球會，就算係陣中前英超黑池預備組前鋒麥當奴都可以考慮，「如果有球會提出借兵的話，都唔排除呢個可能性，我都覺得佢係可造之材，只係仲差啲經驗。」至於港甲新軍東亞運13噚日首次喺晒草灣球場進行友賽，結果憑謝天佑建功，頭威頭勢以1:0擊敗流浪，希望呢班小將繼續有好表現啦！