趣趣地：紅牌被逐怒摑旁證

烏拉圭聯賽打茅波係人都知，形象勁差。好似近排一場由達奴比奧對蒙特維多流浪者場波，達奴比奧末段領先1:0，球員用角球旗戰術拖延時間，點知流浪者嘅巴西後衞迪奧高心火盛一腳踢低敵將，被人趕出場好合理，佢怒意未消，一巴摑落旁證塊面（圖），真係無法無天。迪奧高賽後喊晒口話好後悔，對唔住全世界喎，博同情？冇用囉。