參加07年國際中華小姐奪冠嘅陳爽，喺無綫發展算唔錯，除咗做主持亦有劇拍，不過佢兩個月前就同無綫傾掂數，離開無綫向外闖，仲做咗香港航空嘅營業及市場部企業銷售經理，有指佢同康泰旅行社太子爺黃進達（Jason）關係密切，Jason仲出晒力幫陳爽搵工㖭。
唔知係唔係因為緋聞搞到陳爽激嬲正牌男友AnthonyLeung，所以前晚佢即拖住Anthony去尖沙嘴睇《天煞西部反擊戰》首映。着性感紅裙現身嘅陳爽一臉風騷，仲大方介紹男友係金融才俊，兩人拍咗拖半年。
陳爽原本想低調處理感情事，但因為日前佢被發現同其他異性一齊，為令男友安心，佢就決定拖男友出嚟以正視聽，陳爽大讚男友話：「佢平時有留意我工作，亦都准我性感，今日件衫都係佢揀。」
李晉強留港一年
另外，今屆香港先生冠軍李晉強前晚亦有現身，佢話未同TVB簽約，不過就暫時打消咗返加拿大讀書嘅念頭，佢話：「原本想返去，但家想暫停讀書一年，係呢度試一年先，之前喺加拿大有賺錢，預計都夠使。」
