呢輪有不少照片事件，十分無聊，我地唔係當事人，睇完報上自拍照片，最多笑一笑，或者有老讀者講一聲啋！但如果係當事人呢，報章上照片中人就係自己呢，尷尬死咯，以後親戚朋友圈子中，唔知點樣見人。一位女士對左丁山講：「唉吔，如果佢地閂埋房自己做，關人鬼事咩，做乜要咁吖。」不過做還做，點解要拍照呢？一定係自拍嘅啦，留番做紀念呀？向朋友耍威呀？甚至擺上fb呀？呢啲心態着實匪夷所思，而呢啲照片又不知如何會外傳，於是累人累己累公司，大老闆唔激氣到爆炸先至奇。
自從數碼相機盛行，人人都有大大小小幾架之後（左丁山便有五架），再加上智能電話可以即拍即SMS即上fb，自拍非常普遍，到餐廳食飯，侍應捧上菜式，大家一齊郁手─用電話拍照呀，影完相先至起筷，稍停就上載照片到fb，三十秒後就嗌一聲：「勁快呀，Sammy已經有留言comment。」風氣如此，一啲人連最私隱嘅照片都放入電腦、iPad、iPhone，偶一不慎，俾人hack咗，有乜奇怪。但如果一個人已經四十歲，係政壇新星，得總理睇起，大有前途嘅人物竟然狂玩fb而失去前途，你話奇唔奇。德國執政黨CDU（基督教民主聯盟）有一位議員ChristianvonBoetticher，四十歲，在八月十四日召開記者會，含住泡眼淚，宣佈辭職，令總理默克爾夫人失去一員大將。佢犯咗乜嘢錯失？去年在網上認識一位十六歲女孩子，經過大量電郵、短訊溝通之後，相約在杜薩多夫一間酒店見面，同床兩日喎。女孩子今年十七歲嘞，直認不諱，話Ｂ議員係一個好人。喺英美，犯上呢種事就死梗，但在德國，與十六歲女童交歡係合法嘅，德國電視可以播放美國要打格仔嘅圖片與電影，從來冇政治人物因為婚外情、通姦、私生子、召妓而要辭職，呢位Ｂ議員衰邊科？原來佢受到一致抨擊，鬧佢咁大個成年人，點解沉迷fb，冇嘢做咩，擺咁多私人資料上網，做事態度有問題！呢位議員將自己睇月蝕、飲靚酒啲照片放在fb，時間與公務有衝突，咁就死罪一條啦！