利物浦喺今個夏天使咗幾千萬鎊引入多名星級球員，好似有中場查理阿當、達寧同埋後衞荷西安歷基等等。唔知係唔係呢班球星冇得踢歐洲賽嘅關係，所以領隊杜格利殊喺本土盃賽都派出超豪華陣容，就好似喺周三喺英格蘭聯賽盃次圈作客鬥英甲嘅埃克塞特，紅軍就派出前鋒蘇亞雷斯（左）、安祖卡路爾、門將連拿、中場麥斯洛迪古斯（右）等等，紅軍半場都順風順水，領先1:0；換邊後再憑麥斯洛迪古斯及安祖卡路爾各入一球，最終以3:1獲勝晉級。呢次英聯盃都排出咁強嘅陣容，可見佢哋對啲個盃仔嘅野心都唔細。不過，紅軍上下齊心個個都咁賣力，贏波本來都係一件好事，亦令捧場客賺番唔少，之不過殺雞用牛刀，結果就有手尾跟，就係中場魯爾梅利斯鎖骨受傷，料要唞幾星期，真慘！