黃日華、梁家仁同湯鎮業喺80年代為無綫拍嘅《天龍八部之虛竹傳奇》，呢排無端端好hit，事關翡翠台今個月初啱啱先重播完，唔夠一個月又喺翡翠台深夜重播。
梁家仁死三次
馮仁昭唔係話呢部經典劇唔好睇，但唔夠一個月重播完又重播，就真係幾離譜，冇理由咁大間電視台冇其他劇集選擇吖？難怪噚日有讀者同馮仁昭投訴，話之前朝早起身睇《虛竹》，家晚晚臨瞓前又焗睇《虛竹》，唔知無綫搞乜。
其實今個月初無綫已經因為程序上錯誤而連續兩日播埋《虛竹》同一集，變咗喺劇中演喬峰嘅梁家仁自盡完之後，第二日竟然又死過，睇到觀眾眼都凸埋，勢估唔到嚟緊又要再睇喬峰死第三次。
噚日馮仁昭打電話問無綫外事部蘇先生，問佢點解會有咁嘅安排，佢同節目部了解過之後解釋話：「係應觀眾要求，部劇6月8號起每日上晝10點重播半小時，將原來20集版本剪為40集，觀眾意見話廣告影響咗一氣呵成，唔夠味道，所以今個月22號晚深夜1點25分（即23號凌晨）將《虛竹》再播畀觀眾睇。」
