每位車主揀車背後總有個原因，為品牌、合眼緣，甚至一時衝動，但相信有更多人好似98年馬來西亞華裔小姐冠軍吳天瑜Debbie一樣，要求部車內外兼備，既要滿足父母舒適的要求，也要性能卓越。最近與「車」特別有緣的Debbie，睇中的從來不是歐洲車，而是日本的SubaruLegacy。
記者：蕭漢祥
攝影：譚盈傑
愛上四驅房車
數年前與Debbie相識，每次見她都是在主播台，或是收工坐朋友車去玩，無想過她是個享受駕駛樂的人，她說：「你忘記咗我係馬來西亞人，喺馬來西亞無可能唔開車，即使轉兩個彎落Downtown食嘢，就算明知塞車都要揸。」她回想起人生第一部汽車，正正就是當年選美冠軍贏返嚟的車，從而令她對大大部的四驅車產生興趣，除了喜歡它能駕馭任何路面，亦喜歡四輪驅動的駕駛模式。
愛它外柔內剛
來到香港，要找一部既能迎合她的口味，又配合她形象的DreamCar，Debbie的選擇是Subaru的Legacy2.5GTSedan：「我比較喜歡傳統四門房車，多於現時流行的盒仔車、七人車，尤其是以前睇Rally，我一直都喜歡Subaru的STi，但佢外形太過勇猛，如果係自己的座駕，覺得Legacy啱我啲。」自從去年改新款之後，車身設計保持優雅Feel，內櫳格局更富Fashion感覺，Debbie特別喜歡中控台充滿Metal味道，再者音響、冷氣按鈕直到波箱的鋪排更加簡潔清晰。一字形的波箱設計啱晒女生，想有更強的操控，可以向右一推變成加減波，過程清脆利落。
大馬駕車樂趣多
Debbie自言對車的要求好簡單，好砌就得！見到部Legacy後，她二話不說跳上司機位感受這台2.5公升水平對向Turbo偈，輸出285匹馬力、35.7kg-m扭力的帥哥，她第一句說：「好順！」轉個彎後忍不住踩深少少，第二句已大叫：「好勁呀！」那股力量自3,000轉後開始嚟料，即時令她重拾以前在馬拉自駕遊的回憶。Debbie曾試過由吉隆坡開車到檳城，全程450公里都係高速公路，揸足四粒鐘：「比起香港，馬來西亞的駕駛樂趣多好多，路面好行，沿途欣賞風景，泊車都易啲！」她話好彩過兩日就返家鄉拍劇，順道與愛車相聚。
SubaruLegacy2.5GTSedan
引擎：2,457cc水平對向4汽缸+Turbo
馬力：285ps/6,000rpm
扭力：35.7kg-m/2,000-5,600rpm
傳動：5速自動波四驅
售價：$385,532
查詢：25112727（MotorImage）