Hit爆XB360的《GearsOfWar3》下月推出最終章，究竟人類定獸族獲得最後勝利？今集特別加入操控反派新模式，揸住勁槍勁裝備，由最弱變成最強，輕鬆消滅人類，滿足你潛藏反叛慾望！
記者：陳國輝
UnrealEngine3畫質提升
進入遊戲，視覺享受立即返晒嚟！今次《GOW3》利用咗UnrealEngine3技術，令遊戲畫面無論睇CG抑或進入戰鬥狀態，都變得豐富同細緻；就好似喺夜晚惡戰Boss一幕，唔單止出現大量戰鬥時產生嘅灰塵，最難得係一片模糊當中，仍隱約睇到隊友在走位，甚至由機槍射出嘅火光，幾乎可以追蹤到方向；另外，由戶外直射入屋內嘅光線，感覺亦好溫暖同自然，但仍然係嗰句，如果你無配置高清靚電視，以上東東都係廢話。
變反派聯盟滅人類
玩親射擊遊戲，不外乎係單人、多人、合作及對戰模式，《GOW3》就追加一項新玩法！最終章加入BeastMode，你原本要扮演嘅正派人類角色，搖身變成為獸族嘅一分子，唔止殺人唔使本，最好再Call埋班Friend，一齊合作消滅由MarcusFenix為首嘅D小隊；若然唔做奸人堅，你亦可選擇玩番傳統嘅一對多人模式，甚至4人合作模式，後者更可透過StoryMode進行，唔使一條友單拖玩咁悶。
《GOW3》仲有全新嘅Horde2.0模式，最多支援5名玩家合作消滅怪獸，你消滅得越多，便獲得越多金錢，藉此可購買強化版武器、彈藥以至補血用品；但如果你又驚自己實力未夠班硬撼敵人，也可花費金錢佈置防禦措施，例如障礙物、炮塔等，減低對手嘅進攻，亦都係唔錯辦法。
最後之反擊
話說喺18個月以後，人類就連最後據點Jacinto都失守埋！倖存者流離失所，苟存於廢墟之中都未算悲凉，最慘係惡勢力仍然不斷地膨脹，主角MarcusFenix等會繼續率領人類及一班新加入嘅戰士，誓死與獸族奮戰到底，保衞家園。
《GearsofWar3》
平台：XBOX360
類型：射擊
製作：EpicGames
人數：多人
推出：9月20日
售價：$399
