歐聯附次回合今明兩晚開打，回顧首回合戰況，不少主場分子都先拔頭籌，今次主客對調，對於一些先落後的實力分子來說，實在不容有失；要知道出戰歐聯所帶來的經濟效益，隨時主宰一支球隊未來兩、三季的組軍情況。
因球會嚴重拖糧而引起球員大罷工的西甲，首周賽事最終延期，但對於人腳未算充裕的「黃色潛艇」維拉利爾來說，反而會是一件好事。首回合作客奧丹斯輸0:1，未能取得作客入球固然有危機，但卻令這支實力高深莫測的球隊再無退路，今仗要淨勝對手兩球，才可保住這個得來不易的歐聯參賽資格。
上季早早就拋離西維爾及馬德里體育會等主要對手，取得西甲殿軍的維拉利爾，今季有好波之人辛迪卡索拉以高價賣至馬拉加，只簽入上仗「孭鑊」的烏甸尼斯中堅沙柏達華倫西亞，進攻火力當然有所削弱。
慶幸首回合即使輸波，一眾主力基奧斯比羅斯、尼爾馬、卡尼及保查華利路等仍可製造不少具威脅埋門；今晚返回主場，深信「黃色潛艇」必可發揮行雲流水攻勢，畢竟一對箭頭均具入球本領。
周五手機上網睇超級盃
奧丹斯陣中不少球員都略有名氣，包括拜仁青訓門將韋素斯、前曼聯中場迪贊巴、前皇家蘇斯達前鋒史高保，以及前樸茨茅夫前鋒烏達卡的親弟比德烏達卡等；但大部份所謂球星，實力仍未達歐聯級數，今作客西班牙，面對背水一戰的維拉利爾，應無力再靠運氣偷雞！最值得一提，周五上演歐洲超級盃，手機上網可免費download，去到邊都有得睇直播。（編按：詳情請留意稍後公佈）文：丘建威