當年由鄭丹瑞（阿旦）、林珊珊同何嘉麗主持嘅電台節目《三個小神仙》，當年係香港電台嘅王牌節目，呢三個小神仙仲陪伴住好多當年嘅年輕人成長，成為好多今日父母輩嘅集體回憶。
何嘉麗婉拒
《三個小神仙》轉眼間面世到現今剛好30年，已變成大神仙嘅其中兩位主持阿旦同珊珊，就希望藉呢個時間搞個聚會，打算喺嚟緊嘅11月5日喺紅館搞兩場「30小神仙吹唱會」，至於另一位小神仙何嘉麗，因為目前係九巴企業傳訊部嘅主管，為咗唔想同工作有任何衝突所以就婉拒參與。
噚日阿旦接受電話訪問時話，10年前已經有呢個構想：「嗰時因為各有各忙所以冇咗件事，今年我同珊珊加埋都成100歲，再唔做就真係變甩毛神仙。同埋一直以嚟都有好多已經係人哋父母嘅人問我哋會有乜搞，順應佢哋要求就決定搞個吹水加唱歌嘅聚會。」阿旦仲話以前去紅館都係替人高興、企左或者企右，今次就企正中間可以感受吓氣氛。
另外，唔講唔知，今次負責投資嘅東亞娛樂老闆林建岳原來當年都係小神仙嘅粉絲。