古語有云，「落地喊三聲，好醜命生成」。不信命者當然視之為迷信，姑勿論條命好唔好，八字正唔正嘞，呢啲事，即使係專家都有不同意見。但係好醜呢回事，相信冇得拗嘅噃，例如歷屆香港小姐之中，你話朱玲玲靚吖，還是舊年嗰位港姐（已唔記得佢嘅名字）靚呢？畢菲特靚仔吖，還是布殊靚仔呢？安祖蓮娜祖莉靚唔靚？還是陶三姑靚？周潤發英俊吖還是馬雲英俊吖？答案當然簡單到極，唔駛多講。
靚與醜，正是先天生成，後天可以改容，拉鼻隆胸乜都齊，但絕大部份人士係麗質天生，旁人唔好怨命，至於美麗是否與智慧並重，還是「胸大無腦」，並不重要，總之靚仔靚女搶鏡，係突出一啲。
講命或者迷信，但德薩斯州大學經濟學家DanielHamermesh專題研究外貌與收入，研究咗二十年，出版咗一本書叫做BeautyPays:WhyAttractivePeopleAreMoreSuccessful，內有一個結論，就係靚仔靚女（美國實況）一生人所賺嘅錢，平均比普通面孔人士多出二十三萬美元，靚人特別着數（見時代雜誌及網頁），此外Hamermesh教授指出：（一）調整教育程度後，最好樣（bestlooking）嘅top三分一人士會比平均樣貌人士多賺5%，比最醜樣嘅人士賺多10%至12%；（二）樣貌對男士嘅影響比較大，因為女士有較多選擇，可以離開勞工市場；（三）美麗女士通常會嫁俾高收入男人（呢樣嘢，所有明星姐仔都知）。
咁講法，「人不可以貌相」是不是錯晒？非也，真係有料嘅人經過一番努力，仍然會得到市場賞識嘅，辛苦多啲囉。哈馬殊教授認為以貌取人，帶有歧視性，令整體經濟每年損失高達二百億美元，但佢指出現實就係現實，靚仔靚女搵工特別容易得到老闆聘用，因為老闆們知道所有顧客都鍾意見到靚人，與靚仔靚女傾偈！哎吔，去整容啦，好唔好？但南韓方面又有一個研究顯示，在南韓花一元做整容手術，回報少於一元，即刻蝕本，制唔過！