前西班牙國腳安歷基執教羅馬之後，最艱巨嘅工作擺明唔係調兵遣將，而係處理同球員，特別係隊長托迪（圖）嘅關係。話說上星期場歐霸附輸畀施洛雲場波，佢夠膽死將托迪擺喺後備，令呢個大爺出得18分鐘咁大把，唔扯火至奇。尤其係場波佢哋仲要輸0:1，令「王子」大條道理插安歷基，日前喺訓練場大聲呼喝安歷基。咁快同托迪不和，佢喺羅馬日子唔易過。