人、事及物都會令人有新不如舊的感覺，睇見《來佬奇緣》中的湯漢斯騎住部古董綿羊周圍去，不論是湯伯的精湛演技，還是舊羊的永恒味道，同樣令念舊之人感受至深。香港古董偉士會是知音人，一群年輕人對舊羊不離不棄，每次只揸15分鐘，對住呢班百厭車主，上演了一幕「羊佬奇緣」。
記者：許維雅
攝影：林栢鈞
Model：Wiyona@ModelOne
二手價跟新車相若
要我睇年輕俊男美女扮殭屍的愛情故事，我反而覺得湯漢斯跟茱莉亞羅拔絲於《來佬奇緣》中的細膩交流更有吸引力，可能人大了心境老了，不但覺得電影由金牌舊演員做較好睇，就連車都係舊款更有味道。
見湯伯於電影中鍾意揸舊羊，我亦趁機相約HongKongScooterPower（香港古董偉士會）的成員訪問順道懷舊一番。睇見10位車主帶來的六七十年代Vespa綿羊仔，五顏六色的古典懷舊外形確實更富魅力更富電影感，遊街收視率分分鐘猶勝新羊。10部古董綿羊分別有Vespa150VBB及90SuperSprint，兩款型號都屬偉士於六十年代盛極一時的出品。現在兩款舊羊的二手價都要介乎二萬多至三萬多元，同買架新羊差不多！問會長Paul何以對舊羊特別鍾情，「外形夠獨特，自己鍾意點改、噴咩顏色都得，又可以玩好多裝飾，夠晒個人化。」成班百厭星仲你一句佢一句搶住答話：「夠型囉！媾女易嘛……（下刪大堆無聊廢話）。」
駕駛有技巧 畀油要得宜
眼見10部古董羊都各有特色，可隨心改裝確係古董羊的最大賣點，難怪多數會員來自設計行業。已成立12年的古董偉士會，對改裝綿羊當然有心得，Paul話：「偉士羊最大好處係改裝配件選擇多，我哋一般上外國網訂購，想靚啲用SIP等歐洲品牌配件；想平啲，泰國同越南都有好多。香港運輸署嘅法例較嚴格，外國綿羊真係改到好誇張。」
有傳聞話偉士羊的鋼體車身造工可使用長達45年，但要保養呢班老人家都有一定心得，「唔揸唔得，揸得多又唔好，我哋落雨唔會揸，星期一至五都唔揸，星期六同日就間中揸！每次揸之前更會抹兩個鐘，但只揸15分鐘。」成班百厭星說出如假似真的道理，「揸嗰陣要揸吓又唔揸，哈哈，我意思即係呢啲車屬二衝程車，唔可以不停畀油，引擎會負荷唔到，要時畀時放。其實古董羊電子嘢少，較易維修，每次都係幾百蚊，最常見係撻唔着，有時無電、有時鬆咗線，唔難整番。」嘻嘻哈哈跟呢班儍佬相聚了一個下午，令我明白無呢份儍氣又未必會投資喺呢堆老羊身上呢！
