最廢：韋比（球證）
韋比於周末執法新特蘭對紐卡素的英超比賽，漏判了一個12碼。上半場，新特蘭的施巴斯坦拿臣於龍門口，用手臂將祖爾巴頓的頭槌攻門擋走。當時韋比跟助理裁判商量之後，不判12碼，只給紐卡素一個角球。幸好紐記最後以1:0擊敗新特蘭。
最流：馬賽
法甲已踢到第3周，但上季「2哥」馬賽還未打開勝利之門，3戰全和，只得3分排第12位。去季球隊首席射手雷米已交足功課，頭兩場都有入波，但衰在後防鬆散；好似上仗半場領先歐塞爾兩球，但換邊後被對手連下兩城，最終和波收場。
最堅：狼隊
狼隊開「咧」兩連勝！該支球隊上季踢到最後一周才成功護級，今季脫胎換骨，揭幕戰作客反勝布力般2:1，今周還以2:0擊敗富咸。翼鋒馬菲查維斯兩場合共貢獻一個入波及一個助攻，連續兩周入選英超最佳陣容。
最傷：阿仙奴
兵工廠傷停名單人才濟濟，包括哥斯尼、基蘭基比斯、戴亞比及路斯基等，謝雲奴、桑治和費林邦則停賽；最傷的相信是阿仙奴球迷，球隊沒有大規模增兵，上周末不敵紅軍，下周日又要殘陣鬥紅魔，恐怕凶多吉少。
精采一刻
狼隊（橙衫）與曼城一樣開季兩連勝，相信連自己球迷也始料不及，當然要大事慶祝。GettyImages
討論區金句
阿仙奴vs利物浦
「見到利記出咁嘅陣容，心諗美利拉斯真係差過新仔軒達臣咩！安祖卡路爾同樣浪費機會，睇怕又係另一件水貨，但亦可能不慣踢433戰術。」
「季初輸都好，等佢知道家人腳唔掂，最好輸多幾場，畀啲壓力雲格買人！我係阿仙奴fans都係咁話啦！家輸好過季尾輸！」
保頓vs曼城
「我覺得大衛施華今場真係中場嘅潤滑油再加策動者，有佢喺中場，啲進攻好流暢，而且佢分波、上腳都好到位。」