南韓田徑世錦賽周六正式展開，中國欄王劉翔領軍出戰，大戰前夕亦要輕鬆一番，日前參加某運動品牌嘅活動，與一眾辣妹大跳特跳，劉欄王仲一身「雷人」（據國內網站百度「雷人」為網絡用語，指出人意料且令人格外震驚）奇裝現身，玩開田徑嘅佢跳舞當然冇難度，仲chok住個樣跳得好high，簡直chok過「chok王」林峯！
為世錦賽減壓
04年雅典奧運金牌得主劉翔，今年世錦賽同古巴羅布斯、美國奧利華爭金，壓力當然大，想支持佢嘅田徑迷，就要睇實欄王喺下周日開始出戰世錦賽110米欄嘅賽事啦！欄王遇過唔少風浪，有壓力自然識得點解決，不斷出席公開宣傳活動與民同樂，絕對係好方法！
舉手投足均受注目嘅欄王出席活動，都會有「雷人」奇裝相見，令傳媒相當期待！日前出席跳舞活動，欄王亦再有代表作！佢上身着咗件「JustDoIt」背心，下身着咗一條短褲外，內裏再着一條閃亮嘅黑色緊身長褲，好唔好睇絕對見仁見智，之不過欄王咁都諗到咁着，唔知會唔會成為下期「潮着」？！
話會跑到2015年
「雷人」嘅仲有劉翔之後跳舞嗰part，佢玩慣田徑運動，身體柔軟度當然唔成問題，欄王經過數分鐘熱身後，已經漸漸掌握點樣跳，與一眾衣着性感嘅女舞蹈員融為一體，絕對甚high，只見欄王左扭右扭，表現落力，難得嘅係劉翔喺跳舞時，依然能夠chok住平時氣宇軒昂嘅型爆Look，全程冇索氣，跳完仲同眾辣妹擊掌！
劉翔喺跳舞場chok住跳完舞後，就出席運動匯嘅閉幕活動，仲大談喺世錦賽打破世界紀錄嘅12秒86嘅成績，佢話：「反正現在該準備的，都準備得差不多了，到時候盡全力就好。加油加油！」現時已練成「7步上欄」嘅劉翔之後接受媒體訪問，仲話只要可以，佢會跑到2015年，究竟劉翔能否打破世績，勇奪世錦賽金牌？真係要拭目以待啦！