跑馬仔前夕，唔少民調出爐睇吓邊隻馬最有機。中產動力噚日公佈8月賽事走勢，受訪嘅600幾位中產市民，對3位疑似候選人嘅喜惡排名依次范徐麗泰，支持度有17.2%，唐英年支持度就有13.1%，僅僅以0.2個百分點勝過12.9%嘅勁敵梁振英，好似贏條鼻毛咁多。雖則話有排名，查實3位候選人都極低分，48.2%嘅近半受訪者仲話唔知道或者無意見，睇怕任何一位上場都唔係眾望所歸。
未得中產歡心
至於下屆特首人選最應具備乜嘢條件，約六成中產最希望係有公共行政經驗，換言之無公共行政經驗嘅CY又成包尾大王。負責調查嘅民主黨區議員趙家賢話結果已經反映中產唔多鍾意CY，擔心只識吹水嘅CY會「隊冧」政府，睇嚟CY都要落去中產區做吓騷搶番啲分，唔好淨係顧住睇板間屋同籠屋咯。
調查亦問及受訪者滿唔滿意政府近一年表現，六成幾受訪者唔滿意，原因係政府拒絕復建居屋、壓抑樓價無能，呼籲下屆真命天子唔好畀某個姓氏嘅人玩晒。