賭王何鴻燊子女戀事多，繼三房長女超雲公開承認與陳山聰拍拖後，原來年僅16歲、獲封數學天才的四房兒子何猷君亦情竇初開。前晚賭王與四太梁安琪一家到銅鑼灣開餐，猷君掛住拍拖睇騷，未有陪伴老父。猷君前晚偕貌似傅穎的女友到亞洲博覽館，為博紅顏一笑，猷君講到郁身郁勢施展渾身解數。
賭王三房長女何超雲與陳山聰戀情哄動全城，四太梁安琪的兩個寶貝仔猷亨和猷君亦唔輸蝕，齊齊有拖拍。前晚賭王偕四房到銅鑼灣利園商場的Cova餐廳嘆意大利菜，除四太梁安琪和超欣外，猷亨也帶埋新女友跟父母開餐，但超盈與猷君則未見影蹤。
猷亨與女友跟賭王食飯至晚上8時許便急急腳離開，二人由司機接載直駛往亞洲國際博覽館，欣賞周杰倫和蘇打綠等演出的「LoudFestival音樂節」。
手舞足蹈女友
原來未有陪賭王開餐的四房兒子猷君，也一早抵達博覽館睇騷，前晚9時許，穿紫藍色恤衫襯白長褲的猷君，在音樂會進行期間突然離開會場，身邊還有一位貌似傅穎、穿白恤衫黑裙的長髮女子同行。據知當時正值Mr.演出，估計二人對Mr.沒有興趣，所以走出場外稍作休息。
猷君偕翻版傅穎走到小賣部買了小食和蒸餾水，之後坐埋一邊開餐醫肚。在翻版傅穎面前，猷君表現得相當落力和興奮，不時講到手舞足蹈，逗得女友笑逐顏開，看來他數學跟追女仔同樣有天份。二人唞了15分鐘後，才折返場館繼續睇騷。
四太未見過山聰
此外，賭王和四太及穿上憤怒鳥公仔tee的超欣，前晚8時許離開Cova，問到四太有沒有見過超雲男友陳山聰時，她冷淡地說：「冇喎！呀，做戲嗰個呀？冇呀冇呀。」問四太會否教女兒揀男友？她說：「周身唔得閒。」另外，四太前晚與賭王飯局前，在利園多間名店掃貨，其中買得最瘋狂的是Hermès，見她揀了大批絲巾、手袋和衣服，由保鑣捧住大袋戰利品離開。
採訪、攝影：楊浩賢、李志明、黃曉程
