近日講到邊個係網絡最紅？相信都非千千劉子千莫屬，佢嗰首出位到爆嘅《唸你》MV，到目前為止已經有過百萬點擊，加埋其他網友惡搞版，真係hit到爆。不過大家唔知記唔記得之前另一位喺網上同樣出位嘅「亞洲神童」張如城呢？眼見千千取代咗佢網絡紅人嘅寶座，唔怪得張如城近日忍唔住再度出招，誓要同千千一較高下。
包辦曲詞
每逢有大時大節，任何值得慶祝嘅日子，張如城都突然創意大發推出新歌，當年佢先作咗一首《愛意》鼓勵香港人，吸引唔少網友大力點擊追捧。之後到08年北京奧運，張如城又作咗首《友誼的光采》贈興，但點知俾網友惡搞為《有耳的棺材》，仲幫佢起埋個花名叫「章魚城」，難得張如城一啲都唔介意，好似近日適逢深圳舉行大學生運動會，佢靈感再度湧現作咗首《中國的巨龍》，仲一手包辦作曲、作詞同編曲，真係唔少嘢。
張如城呢首新作當中幾句歌詞係「巨龍巨龍，永永遠遠屹立不倒，巨龍巨龍，永永遠遠亮起來，巨龍巨龍，我為你自豪，我為你驕傲，我為你高歌，巨龍巨龍，Youarebeautiful，Youarebeautiful！」
中西合璧，夠晒國際化，同運動會嘅主題相同，張如城話：「我想呢首歌為港人打氣同增光，我要唱好香港同埋唱好祖國，更希望為世界各地嘅學生打氣同加油。」
