每個女人無論幾叻幾有錢幾幸福，都有一個死穴，就係俾人話唔夠靚；點知碧咸嫂維多莉亞日前就經歷咗呢個「女人最痛」，俾老公碧咸效力嘅洛杉磯銀河擺上枱，要同銀河新援羅比堅尼嘅老婆歌甸妮鬥靚，結果仲慘敗，真係唔嬲就瓦燒啦！
特製新聞稿：你會揀邊個？
美職球隊洛杉磯銀河以350萬鎊（約4,480萬港元）簽咗愛爾蘭前鋒羅比堅尼返嚟，為咗喺羅比堅尼於上周六嘅「地標」戰造勢，竟然印製咗一叠新聞稿，其中比賽當日嘅「拍攝貼士」，就印咗碧咸嫂維多莉亞同羅比堅尼老婆歌甸妮嘅相，相下面仲有句caption，寫住：「你會揀邊個？」（Who'dyourather？），仲長篇大論咁介紹27歲嘅歌甸妮係愛爾蘭小姐，又話佢喺美國網頁TMZ一個「你會揀邊個」嘅選舉之中力壓碧咸嫂。唔知係咪因為唔妥銀河咁做，剛生完女冇耐嘅維多莉亞，喺上周六銀河迎聖荷西地震時，並冇現場觀戰，令到場捧場嘅歌甸妮獨領風騷。
碧咸助羅比堅尼入球
兩個老婆喺球場外鬥生鬥死，但身為丈夫嘅碧咸同羅比堅尼就好專業，喺對地震場波擔正嘅羅比堅尼，就接應碧咸嘅妙傳首開紀錄，協助銀河順利贏2:0。兩人入咗波之後，仲攬頭攬頸慶祝㖭！賽後碧咸就話：「羅比首場比賽就可以入波真係好，對前鋒嚟講，會信心大增。」羅比堅尼亦話：「我今個入球，係報答銀河上下對我嘅信任。」碧咸咁樣協助羅比堅尼入波，我求大俠真係好擔心「萬人迷」返到屋企之後，會俾一向強勢嘅維多莉亞扭耳仔，甚至罰跪榴槤㖭！