李嘉欣前緋聞男友覃輝旗下嘅星美集團，日前喺北京大本營，舉行第二屆中國模特演藝大會其中嘅中國模特兒大賽。有靚女睇，又點少得華華嗰份，當晚參賽嘅模特兒有男有女合共216個，其中女模特兒有173個，泳裝環節，參賽者擺出誘人姿勢，睇到華華血脈沸騰。
大會請咗任達華同惠英紅兩位香港知名藝人撐場之外，大老闆覃輝嘅夫人都到場做大會評判。咁都唔止，聽講一向低調嘅覃輝都在場，華華於是搵勻成場，唔知係咪現場環境太黑，所以華華只係見到佢個細佬、星美國際（198）主席覃宏，但就唔見覃輝影蹤。
題外話，當日模特兒大賽喺室外庭園舉行，唔少昆蟲俾燦爛嘅舞台燈光吸引，直撲去表演台同附近賓客，連華華都俾多隻大昆蟲來襲。不過，台上嘅模特兒新星，即使係着住性感泳裝，喺蟲蟲紛飛下，仍然表現穩定，果然專業。
李華華
mailto:[email protected]