蒙嘉慧(YoYo)前晚與陳展鵬在馬鞍山拍無綫劇集《ATF反恐》,日前YoYo在觀塘警署門外發生交通意外,今次她改坐的士往場地開工,問到當日的事發經過,她說:「詳情唔係好方便講,嗰日意外之後唔想影響其他人,所以警察先了解咗,遲幾日先再去警局落口供。」
「第一次吹波波」
YoYo笑說:「今次係我人生第一次吹波波,香港係一個好衞生嘅城市,吹波波嘅過程完全唔經人手,不過點都好,最緊要個人冇事。」意外後YoYo有通知在內地工作的男友鄭伊健,問到男友的反應?YoYo說:「佢梗係要好冷靜,因為我好震驚,以前未發生過呢啲事,點都有啲徬徨,而且我亦唔知應該點處理。」YoYo更不諱言暫時會以的士代步,她說:「其實多少都會有陰影,加上架車撞花咗又要整,所以咪唔揸住。」
陳展鵬充滿信心
同場的陳展鵬化妝至滿面傷痕,原來前晚劇情指他在雨中被人脅持,蒙嘉慧親眼目睹他被人殺死,展鵬說:「最後係生定死梗係要賣個關子,不過7月拍呢啲場面,加上呢部戲又有好多小意外,所以都會拜吓神。今次呢部戲有好多動作場面,淨係爆破起碼有四個場口。」至於被看好在頒獎禮有望得獎,他笑說:「我嘅心態係希望拍多啲自己鍾意嘅劇,我有信心繼續有監製搵我做嘢。」
採訪:何慧斯
攝影:陳俊強