兩個多小時吃二十家菜館招牌產品，再吃七家酒樓不同方法煮弄沙欄雞與調酒師共吃輕鬆研試乜酒配乜雞；新城財經台主播劉婉芬那名起得好：為食家。
乜家物家各類專家一般情況只是一門做熟了的專業，不及為食家，有人經歷學校或實戰廚房洗禮，有人幾代相傳；無論如何，如非為食根本貼不上邊。
舊老闆笑老闆娘，如果不用吃可以活命，她準會選擇絕食。
對吃全無感覺。
如何界定為食鬼？
不吃這不吃那奉之而行將長命百歲……把鬼，嚴行不過三天繼續大吃這淫吃那，不怕短命，只怕吃得不快活！
為食家呢？愛吃，吃得落，吃得出跟別人認同的角度。在下就是喜歡這「為食家」的輕鬆身份，富遊戲意味，少卻吃得嚴陣以待虛張聲勢。
唔經唔覺新城舉辦「明火食神爭霸戰」瞬間九屆，除卻中間一次出門，玩足八年，對仝人年年搞比賽新意思腦汁晒冷態度着實激讚，從家禽、紅肉、海鮮……甜、辣……到名人下廚、家庭心意等等比賽項目紛陳。今年推出滾熱辣「招牌味力組」，二十家從「寶哥」噴湯生煎包到「友和」麪到「迎」之富貴石榴帶子到「彩福」雞煲鮑翅或高貴「陶源酒家」白雪藏龍……馮美基、顧紀筠等大伙為食家心諗：死啦，「江山薈」的水煮桂花魚如何vs金裝燉奶佬「椰香辣汁雞」？「翠亨邨」桂花蟹肉炒銀絲vs「頂好」XO醬蘿蔔糕炒膏蟹容易比較啫，相對「阿龍巴基斯坦咖喱」牛全燴難度便很高！就是「千福大少」海南雞飯應戰「老苔目」魯肉飯大家同樣香噴噴，為食評判吃兩口人人喊打包，便很為難，更不要說源自泰國正宗「ErawanThai」的龍蝦粉絲煲；唔同國籍㗎！一道一道吃下去，明啦明啦，製作仝人考的是各寶號弄廚人及為食家們的心，不論平與貴，淡到濃，素到葷；準則在心，例如荃灣眾安街「寶哥」的生煎包，冇帶油兼幾乎遲到出局，就是冷凍了，光那爽脆皮底便吃出一眾為食家的丹心。