香港第二季GDP出現按季負增長，同一時間，通脹虎就繼續咆哮，CPI高企喺5%樓上，政府嘅專家仲講到明，未來通脹會繼續升溫，簡單啲講，滯脹已殺到埋身。喺滯脹環境下，普羅市民最辛苦，皆因百物騰貴，生活嘅負擔越來越重，另一方面，由於生產成本係咁升，嚴重削弱企業嘅賺錢能力，老闆賺唔到錢，打工仔想靠加人工對抗通脹，相信只會得個諗字。
面對滯脹風險，要喺股市搵食就更加困難，因為企業盈利差，股價只會有反彈冇升幅，所以戰友們落場只宜走短線，注碼亦要減少，仲要嚴守止蝕，寧願將部份資金調去其他投資工具，好似黃金白銀咁。如果嫌金銀炒得太高，可以北上造人民幣定存，一年可以有5、6厘回報，又或者買現金多、負債唔高嘅藍籌企業債券。最重要嘅係，戰友們一定要有Cash揸手，以備不時之需，正所謂「留得青山在，那怕沒柴燒」。
唐牛