之前有報紙報道今年啲「名牌」月餅非常好賣，半島月餅一上市就預售一空，一日賣去六萬盒，未有預訂得到者，如果想食半島店月餅，等有心人送禮可也。半島月餅以前都好暢銷，但冇今年咁緊要嘅噃，為何如此？秘書V以往年年預訂半島月餅，但去年已經唔買，因為佢感覺到月餅退步咗喎。左丁山亦食過半島月餅三年，去年卒之放棄，原因係家人認為半島月餅非月餅，只是「奶黃棋子餅」，又唔係咁好食。
半島有好多好嘢，排好耐都未輪到佢嘅月餅，例如半島嘅自助餐，收費雖然比香格里拉仲貴，兼且冇咁多款式選擇，菜式品種唔算多，但勝在夠晒精緻，食材用頂級，廚房製作超一流，雖然五百幾蚊一個自助餐，但絕對係全香港首選，復活節假期時食過一次，至今回味不已，吃半島月餅喎，幾十秒後就會唔記得咗。
不過新一代人物或者好鍾意細細個嘅奶黃棋子餅，兼且內地月餅容易作假，高級人士買半島月餅送給內地客，特別有面子。老一派人物仍然喜歡非健康食物如豬油撈飯、豬油蓮蓉月餅，故此左丁山每年雖然收到十幾盒不同牌子月餅，仍然要到近上環一間老牌燒臘舖買純正蓮蓉月、五仁月與雙黃月各一盒，俾老婆鬧浪費都係咁話！
中秋前後一星期，係吃月餅季節，吃得多就會影響心臟、血管，與膽固醇，醫生、營養師如是云。咁講法，買呢啲月餅嚟做乜？左丁山呢類唔識科學之人，比較鍾意仿效他人，譬如蔡瀾食極不健康豬油撈飯便是一例，其他人往往忘記咗，蔡瀾吃飯時一定飲濃過墨汁、直情係黑色嘅普洱茶，有一位朋友學佢咁飲法，飲咗一小茶杯就話個胃頂唔順，不敢再飲。呢，左丁山吃不健康月餅時就學蔡瀾咁飲濃濃的普洱茶（未至到黑色咁誇張），感覺良好。吃中國傳統食品，如果配以西式飲料如啤酒、可樂，點能去膩消滯呀，但年輕人不喜歡中國茶，大塊咕嚕肉送以一啖冰凍可樂，殆矣。