歐美債務危機令人心寒，股市如無底深潭跌極都有，上周五又跌600幾點，估底意義不大，不如離場唞唞。
推介無謂，不如趁跌市做吓功課，研究低殘藍籌，發掘中長線投資機會。彭博引述消息人士報道，思捷（330）擬出售美加成衣零售業務。集團在北美有90幾間分店，首3季銷售增長12%至9.16億銀，雖然唔夠亞太區增長31%咁巴閉，但好過歐洲跌9%。今次賣美加業務，先唔講價錢，起碼撤出美國呢個爛攤子，為重整業務踏出重要一步。
思捷由07年高位跌足8成，今年6月更率先跌穿「海嘯價」28.60元，真係弱到冇朋友。思捷估值雖平，預測PE唔夠10倍，兼有7厘股息支撐，但歐債危機未見底，隨時拖垮其業務，加上拓展神州冇進展，股價似乎仍未見底，暫時放入「觀察名單」好了。
德銀日前都出報告唱淡，認為棉花價格續升，將令毛利率進一步受壓，批發業務亦不樂觀，歐元波動更係重大風險，故將目標價由42.30劈至35.10元，雖然較現價20.50元仲係幾高吓，但市況如此，無謂博。
魏力