Gucci前晚搞90周年派對及秋冬騷，城中靚人名模雲集，包括阮經天、汪東城、范姜、潮人黃偉民、名模琦琦及任達華等。賭王三房長女何超雲和陳山聰公告戀情後首次拍拖出席公開活動，超雲和二房揸fit人、家姐何超瓊坐同一行，但中間隔着Ball后薛芷倫，在「分燊家」事件上，二三房曾聯手，超雲和超瓊前晚初時冇偈傾，但後來都坐埋影合照。超雲就抱怨冇機會拍拖：「希望大家畀空間，拍拖係開心平常事，但每日屋企有十幾架採訪車，邊有機會出外拍拖食飯？」
陳嘉容遭攬腰
同時，名模陳嘉容最受男士歡迎，不少人上前影相，更有熱情型男攬腰錫她下巴，而阮經天在場內最受嘉賓歡迎，變成人肉佈景板。薛芷倫首次帶了21歲、在英國讀英國文學的女兒Tess見世面，問薛芷倫是否想女兒做Ball后接班人？她說：「Ball后只得一個，做個有思想、有教育嘅leader最緊要。」
