【鋒芝變之曙光初現】張栢芝和謝霆鋒的離婚風波仍未解決，但近日有指兩人已傾掂數，據悉前日兩人更罕有地一起出動，為大仔Lucas搞入學事宜。鋒芝緊張關係緩和，霆鋒前晚於溫州笑住出騷，栢芝則在香港首次行騷，更講明「要向前看，人生才沒遺憾。」
霆鋒和栢芝近日各自返港商議離婚細節，更為9月開學的大仔Lucas搵學校。前日一早，有人目睹霆鋒、栢芝和Lucas一家三口齊外出，栢芝負責揸車，與霆鋒為Lucas搵學校，開學問題搞了一個上午，大約下午二時完成。之後霆鋒和栢芝就各自開工，霆鋒飛去溫州參加演唱會，而栢芝就去了灣仔會展，為晚上Gucci行騷作準備。有指鋒芝已就離婚達成初步共識，協議各自封口。
霆鋒笑臉迎人
霆鋒前晚在溫州和王力宏、蔡依林等一齊亮相演唱會，霆鋒全晚心情大好，不時展露笑容，他在台上更大叫「我要狠狠的唱，你們信不信！」之後霆鋒唱了兩首歌，更被嘉賓指是全場嘉賓之冠。霆鋒在台上被司儀問到辛不辛苦？他即說：「一切都還好，不算太壞。」
栢芝前晚則以模特兒身份為Gucci行騷，她於後台準備時特別緊張，人人坐下休息，她不停行來行去練習，逢人都問「我似唔似model？」栢芝續說：「前一日先喺電影劇組趕返香港，今朝又要處理囝囝開學嘅事，好攰！」而栢芝穿上透視長裙行足50米天橋騷，表現緊張生硬，但全場嘉賓對她行騷感驚喜，紛紛站起來影相，其家姐及好友RickChin都在場內打氣。
栢芝行騷圓夢
行騷後栢芝受訪時說：「做人應該要咁，一定要有夢想，仲要實現佢，仲有凡事要向前看，做好自己，人生先會冇遺憾。」據了解，栢芝想圓做模特兒夢，半年前開始和品牌及電視台傾合作，更不收酬勞到米蘭拍攝now特輯及行騷。
另外，栢芝昨已返象山拍《河東獅吼2》，其經理人又表示就《無價之寶》投資方指栢芝違約及沒道德，日內會發律師信給他們。
採訪、攝影：顏英儀、黃文偉、楊浩賢、朱志聰