唐唐語出驚人嘅rubbish論，可能係受新政府總部所啟發；佢有可能發現咗，香港警員就算唔係rubbish，都係rubbish製造者。八方前日參加記協嘅反對打壓表達自由遊行時，竟然喺新總部對面嘅中信大廈樓梯底發現一副棺材，正在大叫「大吉利是」，啋啋聲問邊個整啲咁嘅嘢「賀」政府時，先發現呢副係「特區公安」上周四喺四五行動手上搶番嚟嘅棺材。嘩，當時喊打喊殺係咁搶，搶完又周圍掉，負責票控亂拋垃圾嘅食環署，係咪要跟進吓呢？
香港記者協會上周六發起還我採訪權大遊行，遊行無啦啦要經過中信大廈嘅走火樓梯，當成班真的憤怒了嘅記者走入條樓梯時，竟然見到個棺材。睇真啲係四五行動手製嘅「支持中國茉莉花革命」紅色棺材。
四五行動即製新棺
八方問過出品人古思堯，佢當然唔知棺材畀公安放樓梯底，但絕對唔mind，因為警方已經試過搶走佢無數副棺材「自用」。四五行動原來有個服務承諾，兩日就可以出爐新棺材，佢哋今日都準備好一副四呎棺材送贈特區公安，廿幾卅人會喺今晚7點由政府總部「扶靈」去警察總部，齊齊請一哥曾偉雄「收嘢」。
棺材咁唔老利，「獲贈」棺材嘅中信大廈管理處，係唔係都應該向警方追究，投訴呢嚿「垃圾」企圖搞亂中信集團個風水陣呢？八方覺得中信集團大可以理直氣壯，投訴警方亂拋棺材阻住防火逃生通道。不過中信同政府向來「friend底」，大家都係唔好諗太多，中信大廈日後隨時成為警察「第二總部」都未定㗎。
至於記協嘅反警方打壓採訪自由嘅遊行，自然希望處長級人馬出嚟接請願信，但係警方話之你，只肯派個警區警長出嚟。多位熟悉保安新聞嘅記者一早睇穿，呢啲警長都係「散仔」，完全唔話得事，所以最後寧願撕爛封信，都唔會畀一哥誤以為奸計得逞。
mailto:[email protected]