37歲吳綺莉近日帶同小龍女高調回歸，被認定向成龍還以顏色，但吳綺莉斷然否認：「我又唔係殺人，冇理由終身監禁吖嘛。」今次回歸，吳綺莉無懼成龍，倒是近日家中一群蛇蟲鼠蟻不速之客令吳綺莉母女大叫怕怕。究竟怕見曱甴多啲還是怕見成龍多啲？吳綺莉哈哈大笑說：「怕見曱甴多啲。」 撰文：戴彩煥
吳綺莉99年為成龍產下小龍女卓林後帶同女兒到上海定居，一住便十年。上月底，吳綺莉與女兒回流香港，為無綫生活台主持《女人有話兒》清談節目，又以528萬購得大埔汀角村村屋，在香港落地生根。
嫌樓貴住村屋
這天，吳綺莉接受專訪，談到回歸香港後生活可習慣時，她說：「都OK，可以釣吓魚，踩吓單車，新界地方可以多活動。我好鍾意大自然，鍾意動物，但昆蟲除外囉。」吳綺莉笑言，家中不時有蛇蟲鼠蟻拜訪，訪問當天，她在家中冲凉時便遇上蜥蜴在浴缸暢泳，她說：「新界地方昆蟲特別多，啲小強都特別大隻。」問她現時怕見曱甴多啲還是怕見成龍多啲？吳綺莉想了一會後哈哈大笑說：「怕見曱甴多啲。」既然怕蛇蟲鼠蟻，何不搬回市區居住？她說：「香港啲樓咁貴，唔值，攞嚿錢去外國已經可以買到個山頭。新界地方空氣清新，個女又搵到間好好嘅新界學校，所以先選擇喺新界住。」
教女唔好蝕底
獨力照顧女兒，經濟上可感吃力？吳綺莉說：「啲人好極端，一係講到我發達好有錢，一係就話我慘得好緊要，中間啦，比上不足，比下有餘。」有傳成龍曾一筆過支付吳綺莉生活費，究竟是否屬實？成龍又有沒有盡過父親責任供養女兒？吳綺莉一概封口：「個女自己生，我照顧小朋友係應該嘅，10幾年前生個小朋友出嚟，我都話過唔再講人哋任何嘢，唔想同第三者扯上任何關係。」
自己過往經歷，吳綺莉無時無刻都會提醒女兒不要重蹈覆轍：「必須要咁做！但我又唔係用凄凉角度同佢講，我同個女講因為佢好彩，有阿媽教，我細個冇人教，屋企人成日出去做嘢搵食，由細到大發生任何事都係自己經歷，有事發生咗，嗰件事上我學習咗啲嘢，除咗唔好再犯，我都會同個女講話如果跌親、撞到，下次就要小心，或者做咗啲唔應該做嘅嘢，你唔喺當中學習嘅話，會好蝕底。我自己有乜唔啱、有乜唔好，一定會教我小朋友，無論佢學到幾多，總之喺我能力範圍入面盡量令佢跌得少啲，呢個係我應該做嘅事。」
拒絕自我監禁
可曾後悔當年自己所做一切？她說：「冇，過咗去就過去，唔好鑽牛角尖，我唔係阿Q精神，但十隻手指有長短，唔好成日諗自己冇啲乜嘢，要去諗自己有啲乜嘢。」今次回歸，外界認定吳綺莉是向成龍還以顏色，但吳綺莉失笑否認：「我又唔係拍武打片，冇人同佢爭過！我返電視台，只不過返去搵份工之嘛，好似曾蔭權話做好我份工，tobefair，我又唔係殺人，冇理由終身監禁吖嘛。」
昔日戀愛大過天，今日的吳綺莉的感情生活卻一片空白。難道不羨慕好友邱淑貞或葉玉卿找到個好歸宿？吳綺莉說：「豆斗呢個係萬中無一，好多結婚離婚，或者結咗唔開心，每一樣嘢唔可以睇表面，隨緣啦！我自己唔貪心，個天已經畀咗好多嘢我，我唔敢苛求樣樣要有，我唔係大富大貴，總之生活OK，呢個世界好公平，唔會乜都畀晒你。」
多年來，吳綺莉身邊不乏追求者，但她還未遇上自己杯茶：「我一路都ready，等緊人㩒門鐘，但冇人㩒！正如吳嘉麗話感情可以用鞋嚟形容，細個揀鞋一味要靚，唔理夾唔夾腳、着到起晒泡都要着，到咗某一個年紀就唔係咁睇，你會要對鞋着得舒服，我家情願揀對舒服，都唔要行兩步就黐到成腳膠布嘅鞋囉！」揀鞋，當然還要揀對質地好及完全屬於自己的，不是嗎？
符碌亞姐贏友情
17歲便當上1990年度亞姐冠軍的吳綺莉，原來是為了6500蚊而符碌入行。她說：「當時貪份暑期工，做parttime幫劉娟娟（當時亞姐形象指導）手，跟兩個月有6500蚊，又有得去法國外景，點知我應徵呢份暑期工時，就俾人拉咗去選美，做咗嗰屆冠軍。」
請成龍夫婦太儍
吳綺莉今次回港為無綫生活台主持《女人有話兒》清談節目，打盡人情牌請老友擔任嘉賓，移居美國的葉玉卿第一個舉手支持。吳綺莉：「我打畀卿卿話同佢做電話訪問，點知佢話做視像啦，叫TVB諗辦法，佢係我一世朋友，佢話如果我唔請佢，佢會擔凳仔坐喺TVB門口，一定要上我節目。」
有沒有人膽敢建議找成龍或林鳳嬌做嘉賓？吳綺莉笑住反問：「你覺得呢？呢個唔係夠唔夠膽嘅問題，係大家會唔會做啲咁儍嘅事！」
