身形魁梧的羅仲謙一向給人形象健康的感覺，下周日便27歲牛一的他，昨日突然被舊愛傅穎（Theresa）在公開場合數臭贈興，指他向傅穎出手，令她身上留瘀痕。謙仔認為事態嚴重，昨午趁開工空檔到九龍灣星皓辦公室召開記者會交代事件。
謙仔一臉憔悴現身，記者會歷時僅5分鐘，他全程聲調低沉，心情緊張，卻沒有講稿，在尾聲時更低頭啜泣，謙仔否認動粗打Theresa，並解釋當時兩人爭拗，他只是出手捉着情緒激動的Theresa以制止她，才不慎鍊瘀她，絕非向她動粗。
被check電話起爭執
身穿黑色緊身衣現麒麟臂的謙仔，昨午5時15分返回經理人公司，他甫到達即進房間休息10分鐘平復情緒，其後才在會客室見傳媒，眼紅紅的謙仔壓低聲線說：「其實經過上次件事（指傅穎爆他一腳踏幾船）後，我哋有啲嘢處理得唔好，我好珍惜同佢之間嘅感情，所以我有搵番佢，佢畀我嘅感覺我哋有機會，咁冇幾耐咪喺番埋一齊。」謙仔語氣越說越沉重，而且不時邊說邊唞大氣。
謙仔與Theresa雖愛火重燃，但最終卻逃不開分手厄運，謙仔說：「有可能係信任嘅問題，所以我哋成日都會嗌交，甚至可能會騷擾到啲異性嘅朋友，嗰日（指事發當天）咁啱佢check我電話，我哋咪嗌起交上嚟。」講到出手的戲肉，謙仔開始情緒激動兼眼濕濕，他緊張說：「咁佢嘅情緒激動咗，手舞足蹈咁樣，咁我要制止佢，我捉住佢，可能咁樣會整到佢，所以之後發覺兩個人之間冇咗信任，好難再喺埋番一齊，所以我哋之後真係分開咗，係咁，thankyou！」
心情沉重低頭啜泣
當謙仔交代了與Theresa爭拗過程和分手真相後，記者會隨即結束，當記者提問事發是多久前的事，以及他可有後悔和有否向Theresa道歉時，謙仔一概未有回應，他身邊的經理人Iris代為擋駕說：「今日淨係交代到呢度，其他嘢唔會再多講，佢5點要去開工，所以一定要走。」謙仔依然頭耷耷，還被發現低頭啜泣，臨行前他應記者要求站立拍照，然後他說：「唔好意思。」隨即在經理人和助手開路之下離開。
謙仔剖白事件後，便坐車到粉嶺北區醫院拍攝無綫新劇《OnCall36小時》，劇情交代他與黃智雯在醫院大堂跟朋友傾偈，雖然他昨午交代與Theresa的感情糾紛顯得木無表情，但當埋位拍攝時，他即收起不快，火速投入情緒，但當休息時，其心情又跌回谷底，非常沉重，看來情變給他打擊很大。
謙仔拍完劇便往九龍灣取回自己座駕，隨即在助手陪同下返回大埔墟寓所休息。
採訪：馬建華、朱志聰
攝影：仇志德、羅德光
有情歲月：巨胸謙劈腿跪地認錯
傅穎與羅仲謙這對怨侶可謂新聞多多，兩人09年因同屬星皓旗下而相識，去年6月Theresa出書內容露骨地寫到：「常幻想你的肌肉……好想一口咬下去。」有指那人正是大隻仔羅仲謙。擁40吋胸肌的羅仲謙緋聞不少，入行前當救生員的他身形弗到漏，異性緣甚佳，08年被拍到與台灣藝人葉安婷浪漫行海旁，又跟江若琳結伴夜蒲，去年拍無綫劇時又與藝員黃智雯傳緋聞。
北京私藏正印
Theresa與謙仔曾一度以情侶檔搵真銀，寓工作於拍拖，但去年底Theresa突然數臭他，指他說話冇句真兼劈腿，在北京私藏一位正印女友令她非常失望，更傳出謙仔曾向Theresa跪地認錯。不過當時正值Theresa出新專輯，外界指她只是做大龍鳳假分手博宣傳，年頭謙仔仍被拍到在Theresa香閨過夜。之後兩人要一起宣傳電影《熱浪球愛戰》，但都表現得面左左，在其他活動上雙方都表示拒談對方。