組合講求默契，一凹一凸就最啱key，Boy'z初出道時成員關智斌（Kenny）和張致恒（Steven）不脫稚氣，鏡頭後爭拗不停，隨着人事變遷，圈中磨練，二人思想漸趨成熟，訪問當日，Kenny和Steven難得不掩飾，有話直說互翻舊賬，當中沒帶半點仇怨，卻隱藏着鮮為人知的成籮笑料。Boy'z經過解散又重組，兄弟間的火藥味只會在音樂和舞台上爆發出來。 撰文：比華利
關智斌和張致恒03年組成Boy'z，兩年後一度解散，去年英皇安排兩子重組，分手再復合，二人更珍惜對方，不講不知，他們之間曾動手，Kenny自爆早年曾怒打Steven，Steven日前受訪時即向Kenny還手。
性格不合拳擊臉
Steven入行時僅19歲，當時幼稚懶散，令當年23歲的拍檔Kenny爆，Steven指當年不滿Kenny看不起他，Kenny即說：「當初大家夾唔到，我過份認真，Steven就軟皮蛇，試過佢做嘢差啲noshow，我要去佢屋企爆門扯佢開工。」Steven則說：「當年我性格比較hea，同Kenny好唔同，久而久之，我對佢就起咗幅牆。」
急驚風遇上慢郎中，火山終於爆發，話說二人早年在髮型屋工作時，Kenny忽然不滿Steven的態度，更無明火起，Kenny說：「我一拳打落Steven塊面度，佢想還擊，助手立即扯開，事後Mani（經理人霍汶希）打嚟訓話，佢鬧我打Steven邊度都得，但唔可以打面。」Steven至今沒忘記這一拳，他笑言要找機會以牙還牙，隨即輕拍身邊Kenny胸口示意「還債」，記者笑問可要討利息？Steven搞笑說：「九出十三歸。」
兩兄弟果然不打不相識，往後就更了解，昔日媾女不停的Steven，不時請同居的Kenny評價女友，Kenny說：「當年我哋屋企好亂，只要肯幫我哋執屋洗碗，我就同Steven講呢個女仔好。」而Steven信奉基督教後，做人更有目標，已戒掉花弗。
Steven感激Kenny一直在物質上資助他：「將來我生仔，最好契畀佢，幫我畀奶粉錢。」Kenny聞言反寸：「咁我叫你契爺，你養埋我啦。」經過風雨再復合，單飛發展過的Kenny表示還是愛跟Steven秤不離砣，二人重新出發演繹新作《ReadytoGo》，Kenny更情商同性密友張敬軒包辦作曲、編曲和監製，他說：「的確係我叫佢收平啲幫吓手。」可擔心緋聞再又升溫？Kenny大方說：「冇所謂，大家睇唔厭就得啦，我哋成日都一齊食飯同BBQ。」
妒忌William搶風頭
陳偉霆（William）其實亦與Boy'z有緣，當年他曾獲英皇安排頂替調出的Kenny，Steven曾不滿William遲來先上岸，演出獲安排企正中。Steven現今反省後認為公司安排妥當：「William身材同條件都好，佢成日裝備好自己，我相信機會係留畀準備充足嘅人，所以我由妒忌變佩服同尊重佢。」
Steven爆超雲繪畫冧賭王
張致恒近日與友人合資在新蒲崗經營畫室，吸引不少圈中好友幫襯，而當日訪問就在畫室進行，據知曾與Steven傳緋聞的賭王千金何超雲早前都往作畫冧父，Steven說：「係呀，超雲之前話爹哋生日，佢好想親手畫畫做禮物。」
「佢飛嚟飛去」
Steven大讚超雲的作品風格獨特：「我記得佢嘅構思係一張啤牌中間有啲花，好另類。」自傳出超雲撻着陳山聰，又被爆歐遊後，超雲再也沒現身畫室，Steven取笑說：「佢（何超雲）忙住飛嚟飛去。」可想收超雲D.I.Y畫作？Steven坦率說：「佢嚟幫襯得㗎喇，我收錢㗎嘛。」
出道時只顧媾女荒廢事業的Steven，近年信了基督教後，人生觀大變，問Steven可會把過去經驗跟戀愛大過天的超雲分享？他抵死說：「佢唔好嫌我講耶穌得喇，我家真係好鍾意講耶穌。」
