陳嘉桓憑娟好嘅外表同一對修長嘅美腿，除咗引得林峯嗒晒糖外，亦引嚟一班宅男爭住追捧，女神之路指日可待。不過，原來「陳嘉桓BB」同好多港女一樣，都鍾意chok樣擺甫玩自拍，仲要成日喺廁所度完事，口味同氣味都超重喎！
最近喺討論區流出一批陳嘉桓BB嘅舊相，照片中見到佢為咗影全身，不惜企喺廁板上影，焦點俾個廁塔搶晒。另外一張換上黑色內衣，唔知係咪性感得滯，今次冇企高嚟影嘞。原來陳嘉桓連陌生廁所都唔放過，總之前面有塊鏡，佢就忍唔住㩒快門，名副其實自戀狂一名，同chok峯舊愛潘霜霜一模一樣。
小心藏親密照
另外陳嘉桓噚日同周柏豪、劉美君及RubberBand等人去到會展出席電腦展，陳嘉桓表示拍戲等埋位時會玩電腦打發時間，佢仲話會好小心處理同男友嘅親密合照，佢話：「我影得嘅一定見得人，唔見得人嘅我唔會影，我覺得冇呢個需要。」
對於何超雲同陳山聰公開戀情，問到女方前緋聞男友周柏豪會唔會考慮改追超蓮？柏豪話：「唔會諗，佢人係好好，我當佢係朋友。」
