近日上圍突然升cup有微波身材的容祖兒，繼日前在廣州演唱會上騷身材後，前晚在新城台慶音樂會上再度展示本錢，穿上大低V裙晒小山坡成功搶鏡，楊千嬅即使穿上黑色透視露背裝仍然不敵，千嬅惟有出動老公丁子高送戒指冧招晒恩愛搶分。
新城前晚在灣仔會展舉行20周年台慶音樂會，任賢齊、容祖兒、楊千嬅、古巨基及關心妍（Jade）等演出助興，祖兒、千嬅和Jade悉心打扮鬥靚，近日身材突然升呢的祖兒穿上低V裙出現再騷微波身材，而丁太千嬅則穿上Pucci的黑色露背透視裝上陣。
「肥咗減唔走」
原來祖兒的低V裙是好友黃偉文今年送給她的生日禮物，她說：「廣州個唱有番啲餘溫，所以可以着到，我呢啲平實身材可展現活潑健康性感，真係好性感嗰啲就唔啱自己。」目前身形是否最弗？祖兒說：「以前唔肥嘅地方近日肥咗，減唔走，我未曾試過擁有，惟有試吓培養感情，我唔會刻意豐胸。」
千嬅原先在北京拍戲，專程回港出席，本月11號是她和丁子高結婚周年，她透露老公專程飛到北京逗留3日探班，問到老公送甚麼禮物？她說：「佢用老爺上海第一間舖名《火鳥》整咗隻戒指畀我，係鳳凰形，再用我最鍾意嘅紫鑽造成，好sweet但都好hardsell，不過真係好冧。」
千嬅生仔冇力
但千嬅未有準備禮物，她苦笑說：「隨心睇吓會唔會補番，我真係冇力，連諗嘢食飯都冇力，生仔唔好講喇。」基仔日前生日會上和助手Lorriane終肯合照，但他否認公開戀情，基仔直言：「我未有結婚計劃，但唔排除突然會有咁念頭。」會否有BB後閃婚？他笑言：「咁咪即係閃孕？真係唔知。」
此外，資訊台台長朱明銳表示明年新城會推出數碼音樂台，屆時會請大批新DJ出任主持，但此音樂台不會再搞另一個頒獎禮。
採訪：馬建華 攝影：黃文偉
