市況波譎雲詭，有時信賴自己人腳，一動不如一靜，未必係錯；那管隔籬鄰舍將間屋佈置得金碧輝煌，而自己就冇錢修葺。
同一個圈，玩法可以南轅北轍，球季已開，但曼城、車仔仲要增兵，昆士柏流浪大敗一仗，即刻散到水賣盤畀另一F1車隊班主；20隊英超，大家估唔到，最寒酸竟然係「藍軍」愛華頓。隔籬間紅色大會，自從美國人入主後，不足一年，花了近1億鎊執靚隊波；相反今晚迎戰昆軍嘅另一默西塞德郡球會「拖肥糖」愛華頓，成個夏季只係買斷一位英國出世嘅士砵亭牛奶仔，水乾到傳要賣走當打前列斯聯射球機器碧福特去李城，先可以籌到幾百萬鎊執吓隊波。原來該隊已負債達4,500萬鎊，焗企喺度。仲有就係，揭幕戰原定作客熱刺都改埋期，只慶幸隊長阿迪達唞多個禮拜傷勢痊癒，今晚可以復出領軍。一隊老闆都換埋，上仗主場都吞4蛋；一隊主場初登場，人腳齊整默契十足。提大家，啱啱熱刺都未踢過聯賽，但喺歐霸盃大炒赫斯5蛋當熱身。
有人期待開季，但相信阿仙奴領隊雲格現在所處的窘局，佢老人家或但願由頭再來過。踢咗一場悶蛋聯賽，隊長未及向球迷說再見已貼錢返母會，兩主將動粗停3場；成籮傷兵，另一攻擊主將恨投曼城，不斷放風怨受辱於球迷，今晚英超早場迎戰不斷擴軍嘅利記，單看中場人腳比拼，對手起碼有9至10位當打貴價戰將，供領隊杜格利殊選用，有「爆倉」之盛勢。
雲格呢？可用兼正宗中場，我看得兩位，呈老態嘅路斯基及焗扮中場指揮官的艾朗藍斯；兵荒中，班波嘅仔反而最得益，上屆大部份時間因斷腳豹隱嘅加納小將費林邦，同上屆仲踢緊甲組修咸頓嘅疑似另一天才球星阿歷士張伯倫，隨時候命；其實你估雲格大把錢唔想花費，不過我想佢老人家想睇吓班波下周中入唔入到歐聯主賽圈先算，呢幾日還是靜靜地過。呢場波，有一位仁兄，同雲格一樣同坐一條艇，佢就係馬會操盤手，敢開出阿仙奴讓平/半高水，大有「雖千萬人，吾往矣」嘅勇武，就算臨場轉番阿仙奴免讓球，小弟也決定龜縮，nobet！
投資有時同揀波一樣，你想悶住去贏定係亢奮去輸，視乎每人的心態；查強勢股票現時在風高浪急嘅股市，喺本報財經版也用標題「將會淪陷」來驚嚇化；故本周末賭波策略，先只望看到捧開的、捱過今次風浪；重心貼英超軍容最沒驚喜嗰隊求贏保住信心，保持開朗。下次見報（24/8）
蘋果波神