「大帝」怕「欄王」，縮沙唔鬥跑!?NBA熱火球星「大帝」勒邦占士昨在上海進行中國行最後一站，適逢一連4日的Nike運動匯在同地揭開序幕；他隨即被安排與「欄王」劉翔分組進行在跑步機上鬥快造勢，豈料占士臨陣退出，只在旁為同隊的香港球員吶喊助威，令今次「劉、邦」大戰失色不少！本報特約記者上海直擊
熱火球星勒邦占士昨馬不停蹄，在上海進行訪華之旅最後一站兼最後一日的活動，全日引來數百名球迷及傳媒守候，所到之處定必人頭湧湧，「LBJ、LBJ……」呼聲不絕。全日焦點則落在傍晚6時45分，原定於上海體育館外場與劉翔進行跑步機對決，只是「大帝」最終卻繼去季NBA總決賽後，再一次教球迷失望，臨陣退賽；莫非他害怕被欄王以技術性擊倒？
然而，占士較早時間接受香港傳媒專訪，卻坦言自己喜愛田徑賽事，占士說︰「我最鍾意4x100米接力跑，全隊人一起合力爭勝，感覺很美妙。」05年已曾訪華的他，又直言中國的籃球發展迅速，年輕人不論是籃球員或是其他運動員也應追隨夢想，努力奮鬥；難怪該兩屆常規賽MVP亦深信，NBA的勞資糾紛問題會盡快解決，他亦正努力迎接新球季。
劉翔笑籃球員唔識跑步
可是決心十足的大帝，面對欄王的挑戰卻力有不逮。他與香港4名籃球小將陳兆榮、余耀明、張智衡及蘇尚瀛，硬撼以劉翔為首的上海隊伍，進行3分鐘跑步競技。劉欄王一臉神氣先行進場，當主持隨後介紹其對手時，幽默的他笑說︰「在這裏我還有對手嗎？籃球員不太懂跑步吧！」惹來哄堂大笑。可能占士自知不是其手腳而選擇退出，但他仍以主持即場教的普通話落力為港將隊友說︰「加油、加油！」只是劉欄王不負所託，帶領隊友於3分鐘內跑了3,900米，以900米之距大勝。
右足踝傷患尚未痊癒的欄王，稍後出席記者會表示，本月尾在南韓大邱舉行的世錦賽也不敢輕言爭勝︰「所有對手都很強，但求盡力、加油。」至於占士結束中國之旅後，今早將赴西班牙巴塞隆拿進行籃球技術交流。
《花絮》
靚女賣雪糕睇得又食得
占士駕到搞到上海全城熱辣辣，呢兩位靚女（圖）現身時間就啱啱好嘞；佢哋除咗衣着火辣，向在場球迷大派「冰淇淋」外，原來佢哋真係喺現場賣雪糕，真係睇得又食得。
百變星君玩熊抱
占士打籃球打到叫「大帝」咁巴閉，點知佢原來仲係百變星君，玩咩運動都瓣瓣掂，高球、美式足球、網球通通難佢唔到，當中最耍家就係同班惹火女仔又唱又跳，跳完仲玩熊抱，難怪笑得燦爛過人。
子民無影手傷大帝
「大帝」出巡唔係時時有，「子民」當然想近距離面聖，不過唔係個個擁躉都聽話，活動時就有狂熱球迷，嘗試衝擊在場保安而引起混亂（圖）；占士有次仲畀人群中「無影手」抓傷手臂。
