古天樂因為腳傷拍唔到于仁泰執導嘅電影《忠烈楊家將》，結果要由鄭伊健頂替佢演楊大郎角色。噚日伊健、林峯、鄭少秋、周渝民（仔仔）同吳尊等演員一齊出席北京舉行嘅新片發佈會，平時chok到爆嘅林峯，竟然唔夠前輩鄭少秋咁chok，已經64歲嘅秋官着豹紋衫再加chok爆甫士，搞到細佢一截、今年只係31歲嘅林峯都要企埋一邊。
「自己係不經意Chok」
輸得心服口服嘅林峯話:「秋官係chok祖，自己輸咗。」秋官就話自己件豹紋衫係老婆官晶華安排：「我費事咁搶風頭，所以加咗件黑色褸。」講到chok贏林峯，秋官謙稱自己唔夠林峯chok，又話：「自己係不經意chok，太刻意啲人會反感。」
伊健話早年同秋官合作拍無綫劇《笑看風雲》，佢大讚秋官話：「秋官係chok嘅始祖，佢古裝同時裝chok得有分別，我哋呢啲只可以演英雄，但秋官係真正大俠囉。」伊健話呢排勤力學騎馬，雖然冇受傷，但就練到patpat磨損，要返香港後慢慢醫。