上期「時代」雜誌嘅封面標題夠晒搶眼，就係"TheDeclineandFallofEurope"，下有細字一行，就係"AndMaybeTheWest"，譯成中文，就係「歐洲衰亡」（或包括西方），歐洲最近因為歐豬國家發生債務危機，禍延法國嘅銀行，搞到世界金融市場動盪，又適逢英國發生市民暴亂，縱火搶掠乜都齊，暴露晒英國人恐怖一面，故此「時代」大概有感而發，但呢類大題目，好難信得過，寫得準嘅。大教授福山寫TheEndofHistory，你估歷史真的會終結咩，每日都有新事物發生，無路可捉，未來十年，英國一定會出現幾十篇分析二○一一年倫敦無厘頭暴動嘅論文，為暴亂根由提出新解釋，可惜全部係馬後炮啫，最好有專家現在就發表一篇論文，預測英國式搶掠暴亂會唔會在香港發生，有意競選特首嘅人士現在就要想好一套對策，唔好學卡梅倫咁樣手忙腳亂，後知後覺。
「時代」話英國首相卡梅倫出身Eton、牛津，副首相Clegg克萊格出身Westminster、劍橋，係傳統貴族式精英教育，與街上暴亂群眾（文盲、半文盲、公立學校未畢業）相比，好似來自不同星球，完全唔過電。英國傳統係精英治國，內閣大臣與國會議員大多來自精英學校，但過去二十個世紀嘅英國人願意臣服於精英之下啫，到了二十一世紀呢個誰也不服誰，人人可在網上發聲嘅年代，少數牛劍精英是否可以服眾，大家少不免有疑問，但唔信牛劍精英，唔通相信托定咸群眾可以上台主持大局咩。
講起托定咸，乃香港譯音，與雲咸街、漆咸道、碧咸之類譯名，同樣道理，百幾年前嘅殖民地衙門師爺就係咁譯音嘅啦，依家積習難返，無謂話邊個錯嘞。碧咸譯音雖錯，總好過貝克漢姆。英超5大球會之一熱刺隊之正式名稱係TottenhamHotspur，香港人未必識得Tottenham呢個區，但左丁山小時候已在報紙體育版知道托定咸熱刺呢個名字，最近因此地發生暴動，蔓延英倫，中文報紙跟隨新華社譯做甚麼托甚麼姆，左丁山冇法子記得，一於知錯不改，叫番托定咸好了。