後生仔當然鍾意玩刺激嘢，有潮童之稱嘅巴西國家隊新星尼馬，遇着力撐挑戰極限、崇尚刺激運動嘅潮brand紅牛（RedBull），就當然產生無限嘅火花，年僅19歲嘅尼馬日前仲隻身去咗奧地利，去嘗試從來都冇玩過嘅直升機、賽車活動，想知道真實係點？咁自然要click入動新聞睇吓啦！之不過我求大俠都透露番少少咁多啦！
效力巴甲山度士嘅尼馬成為歐洲列強球會嘅心頭好，之但係佢依然未轉到會，想睇佢有幾好波，暫時真係只可住巴甲同國家隊賽事，之不過跳跳紮嘅尼馬喺暑假期間嘅活動範圍，當然唔止巴西或南美洲咁窄，日前佢就去咗奧地利，參與紅牛為佢安排嘅驚險玩樂之旅。
做得紅牛代言運動員，果然係醒目仔，尼馬行出私人飛機都手執一支紅牛飲料，戴埋印有紅牛Logo嘅cap帽，真係識撈！紅牛為佢安排嘅「PlayDay」活動，主要都係喺位於奧地利嘅薩爾茨堡紅牛博物館內。第一項就係畀尼馬坐上直升機試吓感覺，佢仲扮到好似坐上架戰鬥機咁，認真搞笑！之後再坐上噴射機，感受飛機左右郁動嘅感覺，尼馬立刻大讚「正」！
途中見到類似《鐵血戰士》嘅模型，尼馬仲即時變咗粉絲，高舉智能電話狂影一番。熱身一輪之後，刺激遊戲終於登場，就係坐上紅牛直升機玩360度反轉再反轉！尼馬最初都好淡定，直升機倒轉嗰陣淨係識狂笑，大笑一輪後終可腳踏實地，場地亦由薩爾茨堡轉咗去位於斯彼爾堡嘅賽車場。
玩完飛天揸賽車
之前玩直升機就話冇得自己揸弗，之但係尼馬呢次坐喺KTMX-Bow-247型號嘅賽車風馳賽場，即時有番佢喺足球場上逢人過人嘅霸氣。之不過我求大俠覺得尼馬話晒都係巴西嘅明日之星，玩咁刺激嘅運動真係要做足安全措施，受傷就唔好啦！
