講「能吏誤國」或者稍為誇張，但一啲有能力，有野心嘅高級官員/議員往往以為自己站在道德高地，為民請命，專打大鱷，保護大眾投資者，於是在權力範圍內，用盡所有法律途徑或者訂立新法例來加強監控大小公司，人民不察，傳媒每每讚好，呢類能吏往往得其所哉，登上高位。原紐約州檢察官史必茲（EliotSpitzer）就係用呢個方法而獲選紐約州州長嘅（一九五九年生，二○○七年一月就任紐約州長，二○○八年三月十七日辭職）。佢係地產大亨之子，自普林斯頓大學畢業、得哈佛法學院法學博士（JD），在紐約大律師行工作，九八年靠父親貸款做競選經費，當選紐約州檢察官，以打大鱷，保護投資者利益而成名，後競選州長成功，任內通過一條法案，召妓者有罪，可判監三個月至一年，或罰款，係應佢嘅支持者、維護女權人士而推行嘅。如此人物，夠晒乾淨企理道德喇啩？偏偏就係佢懶醒目，知道在紐約召妓有罪，就走咗去華盛頓call紐約一級妓女（每小時一千美元）到華府與佢尋歡，點知後來俾「紐約時報」踢爆，被逼辭去州長一職，當年俾佢檢控過、名譽掃地嘅保險行業人員現在上訴得直，證明史必茲亂咁嚟，但已經前途盡毀咯。
另一篇IHT報導指出，金融海嘯後民主黨兩位資深眾議員動議通過一條法例，叫做Dodd-FrankWallStreetReformAct2010，旨在加強規管金融機構，誰不知魔鬼藏在細節裏，一啲道德派維權人士（EnoughProject與GlobalWitness）打着反企業貪婪口號，說服議員加入一條條款，禁止從剛果輸入礦產，包括製造手機嘅物料，以為咁樣可以阻止美國企業及東剛果啲土豪惡霸軍閥同流合污，剝削東剛果人民。用心當然係好啦，但呢啲團體往往simpleandnaive，不知天下現實嘅。IHT一位記者講，自從DoddFrankAct實施後，美國大公司紛紛與東剛果斷絕貿易，但害苦嘅，就係當地個體戶、散戶，佢哋挖出嚟嘅礦產冇晒國際買家，陷倒閉捱餓邊緣，一位在當地居住四十五年嘅比利時神職人員慨嘆西方維權組織好心做壞事，根本冇徵詢過當地人嘅意見，就以維護當地人權益自居。可惜吖，國際組織自以為勝利咗，那管當地土人死活。