環保車已是大趨勢，但一下子要改用全電車未必習慣，凡事都係循序漸進好，所以電油車不斷加入綠元素，慳油又令空氣清新。今年日產全力推動電車Leaf，除推出租用計劃外，其實四年前引入港的八人車系Serena亦推出Green版，不停發放綠力量。
記者：蕭漢祥
攝影：楊錦文
綠色生活不斷變
所謂的Green，不只眼前見到車身的GreenColour，今次車身的綠色是今個版本獨有的顏色，代理話不會用於其他車系。不過老實講，綠色車身客路唔算闊，如果可以玩撞色，在車身加Options就更加有味道；不過其實有好多人偏偏獨愛綠色，可能貪佢夠特別。當然，綠色的不止外殼，宣傳單張上還有PureDrive這字，暗地裏表明要駕駛得乾淨，所以日產將大量環保技術投放在Serena身上，首先值得重提的是加入了智能停車熄匙系統IdlingStopSystem，明確地利用煞車腳踏踏下的深度，令汽車在短暫靜止時熄火，而這功能亦備有開關按鈕，如非必要可以自行關掉停車熄火功能。
同時，Serena軚盤右方亦設有慳油模式EcoMode，即使測試當日盡開冷氣及上斜落斜，耗油量平均都低於8L/100公里，且中排座位兩邊的車窗都裝上活動式防曬窗簾，有助降低車廂溫度，變相慳冷氣慳油。仲有一點係大家習以為常而沒有太注意的，是無段變速波箱的發明，其實正是為減少因齒輪磨擦導致動力流失的產品。至於慳油慳成咁，會唔會好影響性能的表現？其實表現真係符合預期，以1,640kg的重量由灣仔奔走上寶馬山，完全無跑到轟轟聲的情況，仲想點？
內櫳設計夠窩心
至於另一新加項目，係唔講大家都未必會發現到的空氣淨化系統，按鈕設於冷氣掣上方，這台稱為「HDPCI」空氣淨化系統設有含維他命C的過濾網，將車廂內的異味及浮游微菌消除，係咪真係有效？就要等下一次TestDrive話你知。
內在美方面，呢部SerenaGreen內櫳座椅跟以前亦有不同，用上比較光鮮顏色的絲絨椅，且廠方話物料有防污及易潔作用，但計我話最大優點，係近來炎熱天氣下，呢張絲絨椅的確無咁吸熱，曬完成粒鐘都無辣手感覺。位於前排座椅之間的手枕，可以由前排移至中排，既可當作中排手枕，放下亦可以變做中排座椅，七座定八座任你改動，坐多啲人不但夠環保，相信在中港長途車市場中地位更鞏固。
NissanSerenaGreen
引擎：1,997cc直四
馬力：147ps/5,600rpm
扭力：21.4kg-m/4,400rpm
傳動：XtronicCVT電子智能無段變速波箱
售價：$273,332
查詢：28035333（合誠汽車）