無咗鼻窿　扭得更順

人可以從DNA尋找自己的根源，其實車同樣都可以，即使每隔幾年外形稍作改善，但由車身到心臟都流動着同樣的血脈。今夏剛推出的2011年SubaruForester，既似曾相識但感覺又有點不同。

記者：蕭漢祥　
攝影：王文忠、譚盈傑
Model：Rika@GME

自然吸氣引擎　頭冚無窿

■2011版的Forester，整體表現比前一代更卓越。

對SubaruForester的印象都幾多樣化，由以前的方頭方角變形金剛，到上一個Generation有大改變，Wagon得嚟又接近STi的惡形惡相，甚至乎被外國傳媒形容為似部小貨車，多過似一部Wagon的時候，來到2011年推出的版本，取其兩者之間，實行兩路客人通殺。
話說上一代Forester主打型號採用2.5公升Turbo偈，來到今個夏天推出的全新型號，首個發現是車頭蓋上的「鼻哥窿」唔見咗，皆因今個版本雖同樣備有2.0公升及2.5公升版本，不過就用上一台富士最新研發的第三代Boxer水平對向四汽缸引擎，符合歐盟五型標準。以4,560×1,780×1,700mm的身形，2.0公升發揮出150ps馬力及20.2kg-m的扭力，明顯地在低轉輸出扭力比前代更暢順！
從數據顯示，新引擎使用了輕量級部件，加上高效能的小型油泵，使到磨擦力流失減少30%，同時增加10%燃油效益。加上分流式的引擎缸體及汽缸蓋的水路都Upgrade咗，從而令冷卻效能更佳，引擎表現更好。在最近國際油價大跌，香港燃油仍高企於每公升$16.4的水平，相信廠方公佈能做出每百公里只耗8.2L燃油的新車，能源效益先係「車主之道」。

■車廂的舒適感依舊，證明廠方改得適宜。

■後排座椅收摺後，即時令尾廂空間大增。

■配備225/55/R17輪胎可以話恰到好處；想劈彎更好可換條更粗的車胎。

■新車保留了特大天窗。

特大天窗空間感足

至於外形方面，鬼面罩的設計稍作改動，令感覺更加平易近人，貼合新車引擎的個性。而車廂內的格局就與前代差不多，電控調校座椅、三幅式多功能軚環，以及司機及乘客都舉腳贊成保留的特大天窗，無形中讓車廂的感覺更加寬敞。後排寬闊的座椅同樣都可以摺埋，提升尾廂的運載力。總括而言，2011版的Forester得分更加平均，簡直就係攻守兼備。