吳耀漢兒子吳嘉龍與韓國女友Leah拍拖多年，豈料原來他已另結新歡，前晚深夜時分，記者發現吳嘉龍偕長髮新歡到跑馬地開餐，二人食飽飽後即忍唔住當街攬住激咀，錫完嘴又錫面珠，之後吳嘉龍再踩到新歡跑馬地香閨共享溫馨。
吳嘉龍出道時被指花弗，但自從4年前他與女友Leah拍拖後便修心養性。不過，原來吳嘉龍已另結新歡，前晚他偕新歡街頭激咀，便被本報記者撞到正。
「大家係發展中」
前晚10時40分，一身街坊裝的吳嘉龍與長髮索女在跑馬地街頭漫步，二人一時搭膊頭一時攬腰，愛得難分難捨。之後吳嘉龍與新歡走到一間日本串燒店欲食串燒，但二人在門外睇餐牌研究一輪後，似乎不合心水，於是走到隔籬街一間名為上海弄堂的食肆嘆上海菜。
男侍應為二人寫菜後，吳嘉龍即忍不住伸手撥弄女友秀髮，表現相當煙韌。前晚二人點了餃子和小菜，食飯期間，吳嘉龍跟女友全程有講有笑，氣氛融洽。
擦足半粒鐘後，吳嘉龍便偕女友離開，二人見街上夜靜無人即忍不住相擁激吻，錫完後，吳嘉龍拿出手機發短訊，其女友則冧爆地將頭靠在男友膊頭上，然後又突然錫男友面珠一啖。
親熱完一輪後，吳嘉龍再與女友手拖手街頭散步，沿途經過不少店舖，二人也有停下腳步眼望望。散步好一會兒後，吳嘉龍便跟隨新歡返回山村道寓所休息。
記者昨日致電吳嘉龍，他表示一年前已與韓國女友Leah分手，問前晚在跑馬地開餐的長髮索女是否其新女友時，吳嘉龍說：「係電影一個朋友嚟，大家係發展中，但我唔想講太多。」
採訪、攝影：楊浩賢、黃文成
