今年53歲嘅梁家輝同老婆江嘉年結婚廿幾年，平日出嚟佢哋都表現好恩愛，雖然家輝越嚟越有男人味，但佢就一直被公認為好老公，甚少傳出緋聞，即使早年佢同靚女助手Janet傳過緋聞，但佢哋夫妻都係恩愛如昔。
曾傳緋聞冇避忌
不過噚日內地傳媒就大字標題話梁家輝撇妻夜會神秘美女，原來近日家輝喺北京同馮德倫拍緊新片《太極》，家輝喺當地被拍到同神秘美女共晉晚餐，其實嗰位神秘美女就係跟佢7、8年嘅助手Janet，雖然兩人曾經傳過緋聞，但就似乎冇刻意避忌，家輝繼續對Janet照顧有加。
飯後散步返公寓
當日佢哋喺飯店傾到雞啄唔斷，家輝細心遞煙畀Janet，兩人邊煲煙邊飲酒吹水，食到咁上下就散步返酒店式公寓，之後深夜都唔見兩人離開。雖然兩人全程冇乜親暱表現，但睇落好似一對情侶，其實Janet個樣同家輝老婆有幾分相似，只係兩人身形同年紀唔同啫，似乎家輝嘅品味好一致，就連助手都要搵個同老婆相似喎。