以前做過一份工，個老細好豪情叫我哋要「workhard,playhard」，不過如果你勤力又得唔到想要嘅回報，工作又唔樂在其中，咁離去似乎又未必係太壞嘅事情。講番做球員嘅，除非你老到走唔郁，不過黑池嘅38歲前鋒菲臘斯肯定係一個例外。
阿仙奴猛將逐個走，早已麻木，不過今次小弟卻對法比仔返巴塞另有一番體會，簡單講仁至義盡；近6個球季都攞唔到一個錦標，這個體系要變，亦非壞事，執番起碼3,000萬鎊，想掂呀。何況，佢係返母會，睇怕以今後兩軍中短線前景及走勢，阿仙奴就算入到歐聯首圈分組賽，但想再對番巴塞嘅尷尬場面，唔易了，但起碼球會有大把水，做到「錢搵錢」呀。
好似曼聯新龍門迪基亞咁，自己未適應，多甩漏，但有星級隊友搭夠，球會照樣起勢咁贏；相反，自己長期一個打十個，捱咗咁多年，你都戥佢覺得冇癮啦，廠迷無謂咒佢返巴塞都係坐喺後備席嘞，衷心祝呢位陪伴我哋已8載嘅球星，更上一層樓，喺地上最強，展翅高飛。希望下次去英國朝聖之前，先去人生第一次嘅魯營球場，向呢位前隊長喝采歡呼，豈不更感動人心。
散散哋嘅阿仙奴喺今晨歐聯附能否打響頭炮，將會成為今午終有空同我好友茶聚嘅主要話題；她早前喺自己地盤笑我潛龍勿用，哈哈，高手性能多低調默默幹，何況小弟見識能力有限。像今天足智彩嘅格局，慣常選日聯同英冠比賽推敲；尤其英冠，幸運能延續上季尾貼附加賽長勝氣勢，開季貼士見得吓人，貼5場中4場，總算樂在其中，唔似法比仔喺兵工廠越踢越冇癮。
續留意黑池嘅波，今晚迎打比郡，上次熱捧黑池入球大，全靠38歲老牌射手菲臘斯包辦兩粒，有運命中；老馬利季初，真的沒錯。可悲嘅係黑池仲要靠佢場場打正選爭回升英超，最攞命係唞得兩日，又要再踢，英冠賽程密多飛沙劈石，跌咗落去踢，有時真係幾苦；菲臘斯老而彌堅，隊波又好搓，但同上季一樣唔識守；換血後全隊絕大部份球員不過30嘅打比郡又唞多一日，鬥攻未知鹿死誰手。
下次見報（20/8）
文：蘋果波神