HP另起爐灶　真正多工爽過iOS

iPad2大戰Android大軍，竟然有生力軍加入，佢係HP預備多時、推出嘅首部webOS平版電腦HPTouchPad。對於玩慣iOS同Android嘅用家，無論係操作介面到玩法，webOS都倍感新鮮，最重要係有超強多工能力，轉App有如Notebook一樣順暢，Tablet版三國大戰要開始喇！

記者：許福合　
攝影：伍慶泉
Model：Kinki@PureModels

背景運行影片照Play

講起Tablet，相信除咗一眾國貨外，一般用家只會記得iPad或Android大軍，今次HP另起爐灶推出嘅TouchPad，所使用嘅其實係HP由Palm接手而來嘅webOS系統，正式推出時已發展到3.0版。除咗擁有全圖像觸控介面外，強項在於有「真正」多工系統。試用時，最明顯例子係玩Game時轉App，按一下Home，屏幕會有一列預覽視窗，顯示正在運作App，如遊戲甚至影片，仍然可以照Play不停。因為App都在背景工作，再切換回來Game時，又可以繼續玩！相比於iOS的半多工，webOS在切換App時，原先App仍然會在背景運作，只有Android機才有類似設計，咁先叫真Multi-Task！

■屏幕大小同樣都係9.7吋，機身大小分別不大。

■唔留神可能睇唔到嘅Home鍵。

■其中一側有兩組喇叭，音質還真不錯。

雜誌式fb

當開到5、6個Apps，發覺遊戲、影片、網頁、郵件等不覺明顯拖慢，試過連開4款遊戲及睇片，在如此大咬App下，整部機反應才稍稍變慢。至於Apps數量，暫時官方公佈有7千多款，雖不及AppStore或AndroidMarket，但熱門程式大多有齊，有排你玩。要與iPad同Android拗手瓜，TouchPad定價相當吸引，最入門嘅16GB只賣$3,180，比iPad2平咗約$700。不過要留意暫時只有WiFi版，3G版推出日期未定，而中文應用方面，只可睇不可寫，暫未有中文輸入。另外，部份操作不夠爽快及人性化，例如搜尋時，每輸入一個字都須搜尋一次，但有明顯遲緩情況。